Alataý aýdany, Daraboz yqshamaýdanynyń turǵyndary jol boıyndaǵy beton tosqaýyldardy ózderi qolmen alyp tastady. Almaty ákimdigi bul aýmaqta jóndeý jumystary júrgiziletinin eske saldy dep habarlaıdy "Adyrna" ulttyq portaly.
«Momyshuly kóshesin kútpegen jerden jóndeýge kirisken almatylyq merdigerler Alataý aýdanyndaǵy Daraboz yqshamaýdanynyń turǵyndaryna eskertpesten, turǵyn úı kesheninen shyǵatyn barlyq negizgi shyǵý joldaryn beton tosqaýyldarmen qorshap tastaǵan», - delingen EGOV.PRESS Telegram-kanalyndaǵy vıdeonyń sıpattamasynda.
Kadrlardan beton bógetterdiń kesirinen júre almaı turǵan kólikterdiń uzyn-sonar keptelisin baıqaýǵa bolady. Artynsha bir top er adamdar qozǵalysty bosatý úshin bloktardy qolmen jyljyta bastaıdy.
Beınejazbaǵa túsinikteme bergen Almaty ákimdigi buǵan deıin Momyshuly kóshesiniń jabylatyny týraly syzba jarııalanǵanyn jáne onda aınalma joldar kórsetilgenin, turǵyndarǵa sharalar týraly aqparat habarlanǵanyn eske saldy. Búginde jóndeý jumystary jalǵasýda.
«Rysqulov dańǵylynan «Daraboz» shaǵyn aýdanyna deıingi ýchaskede jumystar aıaqtalyp, kólik qozǵalysy ashyldy, «Daraboz» yqshamaýdanynan Móńke bı kóshesine deıingi ýchaskede asfaltbeton tóseldi, biraq qospanyń salqyndaýyna ýaqyt qajet. Bul ýchaskede qozǵalys 15 tamyz kúni tańerteń ashylady. Rysqulov dańǵyly boıymen jáne F.Ońǵarsynova, Ýnıversıadnaıa, Móńke bı jáne Aqbulaq shaǵyn aýdany kósheleri boıymen aınalma jol qarastyrylǵan. Sondaı-aq, 14 tamyz saǵat 23:00-den 16 tamyz 11:00-ge deıin Raıymbek dańǵylynan Rysqulov dańǵylyna deıingi aýmaqta kólik qozǵalysy shekteledi. Aınalma jol Taldyaral, Espaev jáne Q.Sháripov kósheleriniń boıymen júzege asyrylady», - deıdi qala ákimdigi.
Esterińizge sala keteıik, 15 qyrkúıekke deıin Sultanbek Qojanov kóshesiniń boıynda Almagúl yqshamaýdanynyń 15-shi ǵımaratynan Taıyr Jarokov kóshesine deıin kólikter úshin qozǵalys jabylǵan bolatyn.
Tipti 15 qyrkúıekke deıin Radostove kóshesinen Gagarın dańǵylyna deıingi ýchaske jabyq bolady. Almatynyń Túrksib aýdanynda 31 tamyzǵa deıin 57 jyl burynǵy qubyrdy aýystyrýǵa baılanysty Súıinbaı dańǵyly boıymen No375 úıden No419 úıge deıin kólik qozǵalysy shekteldi.
