Kesheden beri BAQ bitken Qyrǵyzstan eks-prezıdenti Almazbek Atambaevqa qatysty aqparattardy jarysa jazýda. Osyǵan baılanysty búgin biz Sooronbaı Jeenbekov pen Almazbek Atambaev arasyndaǵy teketires pen Qoı Tashta bolǵan arnaıy operaııaǵa qysqasha toqtalýdy jón kórdik.
TEKETIRES QAIDAN ShYQTY?
Jeenbekov pen Atambaev arazdyǵy 2017 jyly alǵashqysynyń ulyqtaý rásimi aıaqtala salysymen bastaldy. Prezıdent saılaýy kezinde Atambaev Jeenbekovty qos qoldap qoldasa,ınaýgýraııadan keıin onyń rıtorıkasy ózgerip sala berdi. Qos kóshbasshy qarym-qatynasynyń ózgerýine jańa prezıdenttiń bılik basyna kele salysymen jemqorlyqpen kúresýi sebep boldy. Atap aıtqanda Jeenbekov komandasy bılik tizginin qolyna alǵan sátten bastap Atambaev taǵaıyndap ketken kadrlardy ornynan alyp, olardyń ústinen qylmystyq is qozǵaı bastady. Bir sózben aıtqanda jańa prezıdet ózine yńǵaıly jańa saıası alań qalyptastyrýǵa kiristi. Osydan keıin Atambaev keshegi partııalas áriptesin qatań synap, jerden alyp, jerge salý naýqanyna kiristi. Bastapqyda Jeenbekov eks-áriptesiniń bul áreketterine qarsy eshqandaı pikir bildirgen joq. Biraq keıinnen ol «Men eshkimge bir adamnyń múddesin qorǵaımyn degen ýáde bergen joqpyn» dep málimdedi. «Eki qoshqardyń basy bir qazanǵa syımaıdy» degendeı, eki basshynyń joly osy málimdemeden keıin ekige bólindi.
ATAMBAEVQA TAǴYLǴAN AIYPTAR
2019 jyldyń maýsym aıynda Qyrǵyzstan parlamenti Almazbek Atambaevtan «qol suǵylmaýshylyq» mártebesin alyp tastady. Oǵan «bılikti kúshpen tartyp alý», «qylmys áleminiń serkesi Azız Batýkaevty bostandyqqa shyǵarýǵa kómektesý», «jemqorlyq» jáne «jer telimderin zańsyz bóliske salý» baptary boıynsha aıyp taǵyldy. Bas prokýratýra joǵaryda atalǵan aıyptardyń ishinde «bılikti kúshpen tartyp alý» aıybyn negizsiz dep tanyp, qalǵan aıyptar boıynsha Atambaevtyń ústinen qylmystyq is qozǵaýǵa qaýly shyǵardy. Atambaev «qol suǵylmaýshylyq» ımmýnıtetinen aıyrylǵannan keıin, Qoı Tashtaǵy úıinen eshqaıda barmaıtynyn aıtyp, quzyrly organdardyń tergeýge shaqyrtýyn qabyl almady. Biraq Jeenbekov bıligin synaýdy toqtatpady. IIM tamyz aıynyń 7-i kúni eks-prezıdent úıinde bolǵan arnaıy operaııaǵa deıin Atambaevty 3 ret tergeýge shaqyrdy. KREMLGE ShAQYRTÝ Shilde aıynyń 24-i kúni Almazbek Atambaev Reseı bılik ókilderiniń shaqyrtýymen Máskeýge jol tartty. Onda ol RF basshysy Vladımır Pýtınmen kezdesti. Biraq kezdesý Atambaevtyń paıdasyna sheshilmedi. Olaı deıtin sebebimiz, bas qosýdan keıin Pýtın Qyrǵyzstan halqyn Sooronbaı Jeenbekovtyń mańaıyna toptasýǵa, soǵan kómektesýge shaqyrdy.
BUDAN ARY NE BOLÝY MÚMKIN?
Almazbek Atambaevty ustaýǵa jasalǵan talpynys belgilengen shekten shyǵyp ketýdiń sońǵy qadamy desek, onda aldaǵy ýaqytta Qyrǵyzstan halqy ekige bólinýi ábden múmkin. Bir adamnyń ómirin qıyp, 45 adamdy jaraqattaǵan qandy qaqtyǵys «Jeenbekov – Atambaev saıası sagasynyń» basy ǵana tárizdi. Keshegi oqıǵaǵa baılanysty eki basshynyń jasaǵan málimdemelerine qarap, bul teketires búgin nemese erteń aıaqtalady dep aıtý qıyn...
Derekkóz: "The Qazaq Times"
"Adyrna" ulttyq portaly
