Parlament Senaty ekı oqylymda äielderdıŋ qūqyqtary men balalardyŋ qauıpsızdıgın qamtamasyz etu mäselelerı jönındegı zaŋdy, sondai-aq Äkımşılık qūqyq būzuşylyq turaly kodekske tüzetulerdı maqūldady, dep habarlaidy “Adyrna” ūlttyq portaly.
Tüzetuler memlekettık otbasylyq saiasattyŋ qūqyqtyq, äleumettık, institusionaldyq jäne özge de negızderın jetıldıruge, äielderdıŋ qūqyqtary men balalardyŋ qauıpsızdıgın qorǧaudy küşeituge, olardyŋ qauıpsızdıgın būzǧany üşın äkımşılık jäne qylmystyq jauapkerşılıktı qataituǧa, otbasy men tūrmystaǧy zorlyq-zombylyqtyŋ aldyn aluǧa baǧyttalǧan.
Senator Janna Asanovanyŋ aituynşa, zaŋdar memlekettık otbasy saiasatynyŋ qūqyqtyq, äleumettık, institusionaldyq jäne özge de negızderın jetıldıruge, otbasylyq-tūrmystyq saladaǧy zorlyq-zombylyqtyŋ aldyn aluǧa baǧyttalǧan.
"Memleket basşysy kämeletke tolmaǧandarǧa qatysty zorlyq-zombylyqtyŋ kez kelgen türı üşın jazany qataŋdatudy, sondai-aq bılım beru mekemelerınde psihologiialyq qoldau qyzmetın institusionaldyq küşeitudı, bıryŋǧai senım telefonyn ūiymdastyrudy jäne qarauǧa ūsynylǧan zaŋdarda körınıs tapqan zorlyq-zombylyq pen bulling qūrbandaryna kömek körsetudıŋ pärmendı baǧdarlamasyn äzırleudı tapsyrdy", - dedı Senat deputaty Janna Asanova.
"Äielderdıŋ qūqyqtary men balalardyŋ qauıpsızdıgın retteitın" Zaŋmen Qylmystyq kodekske mynadai özgerıster engızıledı:
– adamdardyŋ kämeletke tolmaǧandarǧa qatysty zorlyq-zombylyqqa bailanysty qylmystar kezınde kodekstıŋ erekşe bölıgınde közdelgennen neǧūrlym jeŋıl jaza taǧaiyndauǧa tyiym salu;
– taraptardyŋ kämeletke tolmaǧandarǧa qatysty zorlyq-zombylyqqa bailanysty qylmystar boiynşa, sondai-aq Kodekstıŋ 108-1 ("Densaulyqqa qasaqana jeŋıl ziian keltıru") jäne 109-1 ("Ūryp-soǧu") - baptarynda közdelgen qylmystyq qūqyq būzuşylyqtar tatulasqannan keiın bır jyldan keiın qaitalap jasalǧan jaǧdailarda tatulasuyna jol berılmeidı;
– densaulyqqa qasaqana auyr ziian keltıruge, densaulyǧyna auyrlyǧy ortaşa ziian keltıruge baǧyttalǧan ıs-äreketter üşın bas bostandyǧyn şekteu türındegı balamaly jaza alynyp tastalady jäne bas bostandyǧynan aiyru türındegı jaza belgılenedı;
– kämeletke tolmaǧan adamdy öltırgenı üşın (QK-nıŋ 99-baby), kämeletke tolmaǧanǧa qatysty zorlau jasaǧany üşın (QK-nıŋ 120-baby) jäne kämeletke tolmaǧanǧa qatysty jynystyq sipattaǧy zorlyq-zombylyq äreketterı üşın (QK-nıŋ 121-baby) QK-nıŋ qoldanystaǧy normalarynda közdelgen basqa balama jazalau şaralaryn alyp tastau arqyly ömır boiyna bas bostandyǧynan aiyru türındegı jaza belgılenedı;
– 16 jasqa tolmaǧan adamdarǧa jynystyq sipattaǧy tiısu üşın jauapkerşılık engızıledı;
– özın-özı öltıruge itermeleu nemese kömektesu üşın jaza belgıleidı;
– qylmystyq qūqyq būzuşylyq jasaǧan adamnyŋ mınez-qūlqyna sot qoldanatyn erekşe talaptardy belgıleitın jaŋa bap engızıldı;
– Senat deputattary zaŋdy bırınşı jäne ekınşı oqylymda maqūldauǧa dauys berdı. Qūjat Prezidettıŋ qol qoiuyna jıberıledı. Ol qol qoiylǧannan keiın küşıne enedı.
Ūqsas jaŋalyqtar
