2023 jyldyń 12-13 mamyr kúnderi Almaty shaharynda álemge áıgili vırtýoz-skrıpkashy Marat Bısenǵalıev pen Qurmanǵazy atyndaǵy Qazaq ulttyq halyq aspaptar orkestriniń birlesken eksklıýzıvti premerasy ótti. Esimi jahan jurtshylyǵyna tanymal óner ıesiniń qazaq mýzykasynyń asqaq shyńyna aınalǵan ulttyq orkestrmen birlese ótkizgen mýzykalyq jobasy elimizdiń mýzyka mádenıetindegi aıtýly oqıǵa boldy.
Álemdik klassıkalyq týyndylardyń shedevrleri oryndalǵan keshte Ulttyq orkestr, QR eńbek sińirgen qaıratkeri Marat Bısenǵalıev, jas mýzykant, výnderkınd, pıanıst, Úndistandaǵy NCPA akademııasynyń oqýshysy Aıaan Deshpande óner kórsetti.
Qurmanǵazy atyndaǵy Qazaq ulttyq halyq aspaptar orkestriniń bas dırıjeri, Memlekettik «Daryn» jastar syılyǵynyń laýreaty Abylaı Tilepbergen erekshe kesh týraly óz oıyn bildirdi:
– Árıne, eki kúnge sozylǵan álem adamynyń Ulttyq orkestrmen birlese uıymdastyrǵan konerti óte joǵarǵy deńgeıde ótti. Eki kún boıy Qurmanǵazy orkestriniń ǵımaraty óner súıer kórermen qaýymǵa lyq toly boldy. Barsha kórermendermizdiń ystyq yqylasyna, ónerge degen súıispenshiligine alǵysymyzdy bildiremiz. Álemdik deńgeıdegi klassıkalyq tanymal týyndylardy qazaqtyń halyq aspaptarynyń súıemeldeýimen oryndaý, ári ony tyńdaý júrekke qýanysh, kóńilge jylý uıalatady.
Aıta keteıik, Marat Bısenǵalıev – álemdik mýzyka mánedıetinde ózindik orny bar daraboz mýzykant. Ol halyqaralyq mýzyka mádenıetine qosqan úlesi úshin altyn dıskilerdiń jáne úkimettik nagradalardyń ıegeri. Búginde Marat Bısenǵalıevtiń tańǵajaıyp óneri týraly ataqty brıtandyq «The times» gazeti «Keremet skrıpka solısi», al amerıkandyq «Fanfare» jýrnaly «qazirgi zamanǵy Izaı» dep jazdy. Sondaı-aq «The New York Times» óner ıesi týraly «Ol 19 ǵasyrdyń basyndaǵy skrıpkada oınaý sheberliginiń aıryqsha belgisi bolǵan utymdy stılderdi jandandyryp qaıta jańǵyrtýshy» dep jarysa jazýda.
