Búgin – alty alashtyń abyzy, ǵulama ǵalym, ǵylym isin uıymdastyrýshy birtýar qaıratker, túrki halyqtary folklortaný ǵylymyna sony betburys ákelgen biregeı tulǵa Seıit Asqaruly Qasqabasovtyń týǵan kúni.
Ǵalymdy eske alyp, Halyqaralyq Túrki akademııasynyń ǵylymı qyzmetkeri, fılologııa ǵylymdarynyń kandıdaty Aqedil Toıshanuly Facebook paraqshasynda jazba qaldyrdy.
“Seıit Asqaruly baǵzy zamannan jalǵasqan baı muramyzdy jańasha zertteýdiń teorııalyq-ádisnamalyq negizderin,qaǵıdatyn, janrlyq sarasyn jasaýmen birge ultymyzdyń oı-órisin túletip, túrlenitip, alǵa súıregen oıshyl, jańǵyrtýshy tulǵa. Onyń qadaý-qadaý eshqashan eskirmeıtin irgeli monografııalary bir tóbe, áıgili qazaq halyq qazynasynyń tańdaýly nusqalary toptastyrylǵan, júıelegen «Babalar sózi» júztomdyǵy bir tóbe. Júztomdyq folklorlyq mura álem halyqtarynda áli jaryq kórmegen, demek bul eńbekpen teńdese alatyn eshqandaı mıras dúnıejúzinde joq, bola da qoımas dep oılaımyn. Bul – qazaq halqynyń jadysy berik, tamyr baýy tereń,jaýharly,yrysty el ekendiginiń kórsetkishi, ári Seıit Asqarulyndaı akademık abyzdyń kóz maıy, mańdaı teri, jankeshti eńbeginiń úlken dáleli.
Sıyrshyǵa da eńbek erin shúlendeı taratyp júrgen syıshyl halyqpyz, beınetqor akademık aǵamyzǵa kózi tirisinde QR eńbek eri ataǵy buıyrady dep kámil senem. Babalar arýaǵy jar bolyp Seıit Asqaruly kóke júz jasańyz, keıýana, barsha ǵalym shákirtterdi mańdaıynan sıpap, aq dastarhan jaıyp, quraq ushatyn Tamara tátemiz ekeýińiz nemere-shóbere, ini-qaryndastardyń qyzyǵyn kórip, táýelsiz elimizdiń arqatiregi, tumary, aıbyny bolyp baqytty shat-shadyman ǵumyr keshýge Táńir jar bolsyn. «Qasqabasovta qasqa jol, basqalarda basqa jol» dep aqyn aǵamyz aıtqandaı dara dańǵyl-súrleýińiz uzaqqa, alysqa jalǵasa bersin”, dep jazdy Aqedil Toıshanuly.
