Mınıstr kıiz úıde jartylaı jalańashtanyp bılegenderge qatysty pikir bildirdi, dep habarlaıdy "Adyrna" ulttyq portaly.
QR Mádenıet jáne aqparat mınıstri Aıda Balaeva áleýmettik jelisinde halyq arasynda rezonans týdyrǵan vıdeoǵa jaýap berdi.
“QR Mádenıet jáne aqparat mınıstri retinde kıiz úıde bı bılep, beıádep áreketimen qoǵam nazaryn aýdartqan beınerolık týraly aıtqym keledi. Mundaı kontent qoǵamda alaýyzdyq týdyrýy múmkin. Arandatýshylyqqa da uryndyrýy yqtımal. Árıne, óskeleń urpaq tárbıesine keri áserin tıgizedi. Vıdeonyń mazmuny qazaq halqynyń qundylyqtary men salt-dástúrlerine qaıshy keledi,”- dep jazdy mınıstr jelidegi paraqshasynda.
Aıda Balaeva ulttyq qundylyqtan bas tartý ǵurpymyzǵa qaýip tóndiretinin de aıtty.
“Memlekettik áleýmettik tapsyrystar dástúrli qundylyqtarymyzdy saqtaý men nasıhattaýda erekshe jaýapkershilikti talap etedi. Ulttyq qundylyqtardan bas tartý mádenıetimizge, salt-dástúrimizge jáne ádet-ǵuryptarymyzǵa qashan da qaýip tóndiredi,”- deıdi ol.
Aıta keteıik, keshe áleýmettik jelide 2 qyz ben er jigittiń kıiz úıde jartylaı jalańashtana túsken beınesi taraǵan edi.
