92 jasqa qaraǧan şaǧynda fransuz aktrisasy Brijit Bardo dünieden ozdy. Qaiǧyly habardy fransuz būqaralyq aqparat qūraldary jazdy, dep habarlaidy "Adyrna".
L’Humanité gazetınıŋ mälımetınşe, äigılı aktrisa Fransiianyŋ Jerorta teŋızı jaǧalauyndaǧy ırı qalasy — Tulonda köz jūmǧan. Qaraşa aiynda BAQ onyŋ osy qaladaǧy jekemenşık klinikalardyŋ bırıne jatyp, operasiia jasalǧanyn habarlaǧan bolatyn.
Brijit Bardo — fransuz aktrisasy, änşı, model, januarlar qūqyǧyn qorǧauşy belsendı, 1950–1960 jyldardaǧy stil ikonasy.
Ol 15 jasynda Elle jurnalynyŋ mūqabasyna şyǧyp, 18 jasynda kino salasynda debiut jasady. Al älemdık daŋq oǧan rejisser Roje Vadimnıŋ «Qūdai… äieldı jaratty» (1956) filmındegı rölı arqyly keldı. Būl tuyndydaǧy erkın ärı sezımtal äiel beinesı körermenderdı taŋǧaldyrdy ärı täntı ettı.
Brijit Bardo şamamen 50-ge juyq filmge tüsken. Olardyŋ qatarynda «Aqiqat» (1960), «Mensınbeu» (1963) jäne «Viva Mariia!» (1965) kartinalary bar.
1973 jyly, 39 jasynda, ol akterlık mansabyn aiaqtap, ömırın januarlardy qorǧau ısıne arnady. 1986 jyly Brijit Bardo qoryn qūryp, itbalyqtardy aulauǧa jäne januarlarǧa qatygezdık körsetuge qarsy kürestı.
2021 jyldyŋ jeltoqsanynda Bardo Qazaqstan Prezidentı Qasym-Jomart Toqaevqa hat jazyp, januarlardy qorǧau turaly zaŋ jobasyndaǧy bır bapty alyp tastaudy sūraǧan.
Al 2019 jyldyŋ jeltoqsanynda aktrisa Qazaqstandaǧy januarlarǧa jasalyp jatqan qatygezdıkke qatysty Prezidentke şaǧym joldaǧan bolatyn. Sol kezde Qasym-Jomart Toqaev aktrisaǧa jauap berıp, memlekettıŋ būl mäselege nazar audaryp, özın meiırımdı ūlt retınde körsetuı kerektıgın, tek balalardy ǧana emes, januarlardy da qorǧau maŋyzdy ekenın atap ötken.
