11 mausymda Disney men Pixar studiialary şyǧarǧan «Oijūmbaq 2» filmınıŋ tūsaukeserı öttı, dep habarlaidy "Adyrna" ūlttyq portaly.
Būl turaly Mädeniet jäne aqparat ministrı Aida Balaeva mälımdedı. Ministr Facebook jelısındegı paraqşasynda jazba jariialady. Ol körermenderdıŋ Disney premeralaryn ünemı erekşe yqylaspen kütetının de atap öttı.
"Būl dästür biyl da jalǧasyn tapty. Būǧan deiın qazaq tılınde körsetılgen «Moana», «Kokonyŋ qūpiiasy», «Arystan patşa» (2019) filmderınıŋ qatary jaŋa tuyndylarmen tolyqty. Biyl alǧaş ret Disney men Pixar studiialary «Oijūmbaq 2», Disney studiiasy «Moana 2», «Mufasa: Arystan patşa» dep atalatyn animasiialyq filmderın öz qarajatyna qazaq tılıne audardy.
Filmderdı türlı elder mädenietı men tanym-tüsınıgıne beiımdep, dubliajdau – Disney kompaniiasynda būrynnan qalyptasqan ürdıs. Kompaniia jyl saiyn är filmnıŋ türlı tılderdegı 30-ǧa juyq nūsqasyn ūsynady. Qazaq tılınıŋ osyndai ırı tılder qataryna qosyluy – bız üşın maŋyzdy oqiǧa, jaqsy jaŋalyq. Būl qazaq tılınde erkın söileitın ortaǧa da,
tıldı üirenuşılerge de paidaly, ärı quanyşty jaǧdai.
Qazaqşa dubliaj salasy soŋǧy jyldary jaŋa deŋgeige köterılgenın bärımız jaqsy bılemız. Mäselen, «Oijūmbaq 2» filmınıŋ dubliajynda da jaŋalyq köp, qazaq tılınıŋ qoldanys aiasyn, äsırese balalar arasynda sirek qoldanylatyn töl leksikany ornyqtyruǧa jol aşatyn mysaldar köp. Ana tılımızdıŋ qoldanys aiasyn balanyŋ süiıktı keiıpkerlerı arqyly keŋeitu – öte ūtymdy täsıl. Filmnen şyqqan är büldırşın jaŋa söz üirenıp, ony qoldana alsa, jaqsy emes pe?!
QR Mädeniet jäne aqparat ministrlıgı Disney studiiasynyŋ būl bastamasyna qoldau bıldıredı jäne ony özge de kontent jasauşylarǧa ülgı bolatyn öte jaqsy bastama dep tanidy. Mūndai bastamany qoldap, özgelerge mysal retınde taratuymyz kerek.
Osy jobaǧa mūryndyq bolyp, ony jan-jaqty qoldaǧan «Qazaq tılı» qoǧamyna alǧys bıldıremın.
«Oijūmbaq 2» animasiialyq filmı 14 mausymnan bastap kinoteatrlarda körsetıledı. Sızderdı qazaqşa dubliajdy qoldauǧa şaqyramyz!" - dedı ministr.
