قازاق تىلىنە اۋدارىلىپ، دىبىستالعان شەتەل مۋلتحيكايالارى كورەرمەنگە جول تارتپاق

بۇل تۋرالى مادەنيەت جانە اقپارات ءمينيسترى ايدا بالاەۆا مالىمدەدى. مينيستر Facebook جەلىسىندەگى پاراقشاسىندا جازبا جاريالادى. ول كورەرمەندەردىڭ Disney پرەمەرالارىن ۇنەمى ەرەكشە ىقىلاسپەن كۇتەتىنىن دە اتاپ ءوتتى.

"بۇل ءداستۇر بيىل دا جالعاسىن تاپتى. بۇعان دەيىن قازاق تىلىندە كورسەتىلگەن «موانا»، «كوكونىڭ قۇپياسى»، «ارىستان پاتشا» (2019) فيلمدەرىنىڭ قاتارى جاڭا تۋىندىلارمەن تولىقتى. بيىل العاش رەت Disney مەن Pixar ستۋديالارى «ويجۇمباق 2»، Disney ستۋدياسى «موانا 2»، «مۋفاسا: ارىستان پاتشا» دەپ اتالاتىن انيماتسيالىق فيلمدەرىن ءوز قاراجاتىنا قازاق تىلىنە اۋداردى.

فيلمدەردى ءتۇرلى ەلدەر مادەنيەتى مەن تانىم-تۇسىنىگىنە بەيىمدەپ، دۋبلياجداۋ – Disney كومپانياسىندا بۇرىننان قالىپتاسقان ءۇردىس. كومپانيا جىل سايىن ءار ءفيلمنىڭ ءتۇرلى تىلدەردەگى 30-عا جۋىق نۇسقاسىن ۇسىنادى. قازاق ءتىلىنىڭ وسىنداي ءىرى تىلدەر قاتارىنا قوسىلۋى – ءبىز ءۇشىن ماڭىزدى وقيعا، جاقسى جاڭالىق. بۇل قازاق تىلىندە ەركىن سويلەيتىن ورتاعا دا، ءتىلدى ۇيرەنۋشىلەرگە دە پايدالى، ءارى قۋانىشتى جاعداي.

قازاقشا دۋبلياج سالاسى سوڭعى جىلدارى جاڭا دەڭگەيگە كوتەرىلگەنىن ءبارىمىز جاقسى بىلەمىز. ماسەلەن، «ويجۇمباق 2» ءفيلمىنىڭ دۋبلياجىندا دا جاڭالىق كوپ، قازاق ءتىلىنىڭ قولدانىس اياسىن، اسىرەسە بالالار اراسىندا سيرەك قولدانىلاتىن ءتول لەكسيكانى ورنىقتىرۋعا جول اشاتىن مىسالدار كوپ. انا ءتىلىمىزدىڭ قولدانىس اياسىن بالانىڭ سۇيىكتى كەيىپكەرلەرى ارقىلى كەڭەيتۋ – وتە ۇتىمدى ءتاسىل. فيلمنەن شىققان ءار ءبۇلدىرشىن جاڭا ءسوز ۇيرەنىپ، ونى قولدانا السا، جاقسى ەمەس پە؟!

قر مادەنيەت جانە اقپارات مينيسترلىگى Disney ستۋدياسىنىڭ بۇل باستاماسىنا قولداۋ بىلدىرەدى جانە ونى وزگە دە كونتەنت جاساۋشىلارعا ۇلگى بولاتىن وتە جاقسى باستاما دەپ تانيدى. مۇنداي باستامانى قولداپ، وزگەلەرگە مىسال رەتىندە تاراتۋىمىز كەرەك.

وسى جوباعا مۇرىندىق بولىپ، ونى جان-جاقتى قولداعان «قازاق ءتىلى» قوعامىنا العىس بىلدىرەمىن.

«ويجۇمباق 2» انيماتسيالىق ءفيلمى 14 ماۋسىمنان باستاپ كينوتەاترلاردا كورسەتىلەدى. سىزدەردى قازاقشا دۋبلياجدى قولداۋعا شاقىرامىز!" - دەدى مينيستر.