Äielın ūrdy dep aiyptalǧan Qazaqstan Respublikasynyŋ Bırıkken Arap Ämırlıkterındegı elşısınıŋ kömekşısı qyzmetın atqarǧan Säken Mamaş bükıl män-jaidy tüsındırdı, dep habarlaidy “Adyrna” ūlttyq portaly.
Diplomattyŋ mälımdemesın tolyǧymen tömende ūsynamyz:1. Ömırbaian
Soŋǧy kezde otbasymnyŋ mäselesı düiım jūrtqa jaiylyp jatyr, Qūdai basqa salmasyn, mūndai jaǧdaidy eşkım qalamasa kerek.
Älı künge deiın bala-şaǧamdy qorǧap, janūiamdy saqtap qalǧym keledı, alaida, ökınışke būl ümıttıŋ şyraǧy endıgısı sönıp bara jatqandai.
Otbasy men üşın qai kezde bolmasyn bırınşı orynda boldy. Janūiamdy Allanyŋ amanaty dep qabyldap, olardyŋ bügını men erteŋıne barlyq jauapkerşılıktı tolyq sezınemın.
Jūbaiym Karina Qūdai qosqan jarym, balalarymnyŋ anasy.
Künı keşege deiın janūiadaǧy ekı eresek adamdy otaǧasy men anasy dep sanap, otbasymyzdyŋ baqyty üşın qoldan kelgennıŋ bärın jasap, şükır jaqsy ömır sürıp, bolaşaqqa josparlar qūryp keldık.
Sürınbeitın tūiaq bolmaidy demekşı, ärbır otbasyda ydys aiaq syldyrlamai tūrmasa kerek. Būndai jaǧdaidyŋ oryn alǧanyna qatty ökınemın, jūbaiyma da aittym, kez-kelgen künı qaita tatulasuǧa daiynmyn, ūlym men qyzymdy saǧyndym.
Qatelıkter ekeumızde de boldy, qazır tergeu jürıp jatyr, sot kınälı dep tapsa, erkek toqty qūrbandyq degendei, jauapkerşılıkten qaşpaimyn.
Öz basym būl jaǧdaidy ömırdegı synaq dep qabyldap, barynşa sabaq aluǧa tyrysyp, tünnen keiın kün şyǧar dep ümıttenemın.
Hoş, äkem qazaq, şeşem qazaq, auylymda jetınşı, kenje ūl bolyp düniege keldım. Äke-şeşem qara şarua, öz eŋbegımen adal asyn tauyp, balalaryn asyrady.
Jastaiymnan asyq atyp, tai şaptyryp, aǧaiynǧa qyzmet etıp, aqsaqaldardyŋ qolyna su qūiyp, qazaqi tärbie kördım.
Mektep tabaldyryǧyn auylda attap, esımde, daiyndyq synypqa barǧanda ekı äpkemnıŋ arqasynda köbeitu kestesın jatqa bılıp bardym, sabaq arasyndaǧy üzılıste ülken klastyŋ ūl-qyzdary menen köbeitu kestesın sūrap, taŋdai qaǧatyn.
Qūdai bergen qabılettıŋ arqasynda bılımge jaqyn boldym, besınşı klasqa qarai aǧam jazylǧan orysşa gazet-jurnaldardy oqitynmyn. Üidegı, mekteptegı kıtaphanalardaǧy qyzyq kıtaptardy bırneşe qaitara oqyp tastaitynmyn. Eŋ süiıktı kıtabym atamyz Berdıbek Soqpaqbaevtyŋ «Balalyq şaqqa saiahaty» edı, ony kemınde jüz märte oqyǧan şyǧarmyn.
Sonymen, jetınşı synyptan soŋ bılım quyp Almatydaǧy mektep-internetqa oquǧa keldım. Bır jyldan Anam marqūm «kenje balamnyŋ qiianda jürgenı auyr boldy» degen soŋ Şymkenttegı mektep-internatqa auysyp kelıp, sonda attestat aldym.
Mektep bıtırgen soŋ qaitadan Almatyǧa kelıp, rahmettık Zaŋ ǧylymdarynyŋ doktory, professor, Qazaq ūlttyq Zaŋ universitetınıŋ rektory Naǧaşybai Şäikenovtyŋ ädıldıgı men prinsipşıldıgınıŋ arqasynda öz küşımmen Zaŋ universitetıne biudjetke oquǧa tüsıp, üzdık bıtırdım. Sosyn ekı jyl Äl Farabi universitetınde magistraturada bılımımdı şyŋdap, üzdık diplom aldym.
Ekı diplomdy qolyma alyp, elıme qyzmet eteiın dep arman quyp Astanaǧa keldım. Äuelı bır mekemede kontraktpen ıstep jürıp, jarty jyldan soŋ Syrtqy ıster ministrlıgıne qūjat tapsyrdym. Ministrlıktıŋ basşylyǧynyŋ obektivtı qarastyryp, käsıbi baǧalauynyŋ arqasynda diplomatiialyq qyzmetke qabyldandym.
Qyzmet ete jürıp, diplomatiia salasyna öte qajettı bolady degen nietpen özge tılderdı jetık meŋgeruge tyrystym. Atap aitqanda:
1. Aǧylşyn tılın jetık bılemın, diplomatiialyq deŋgeide sauatty jazyp, söilei alamyn.
2. Orys tılın de jetık meŋgergenmın. Söileu, jazu, diplomatiialyq qarym-qanytas deŋgeiım de joǧary.
3. Türık tılın de jetık meŋgergenmın. Söileu, jazu, diplomatiialyq qarym-qanytas deŋgeiım joǧary, erkın jūmys ısteimın.
4. Arap tılın de jaqsy meŋgergenmın. Qajettı materialdardyŋ bärımen jūmys ıstei alamyn.
5. Qazaq tılı özımnıŋ Anamnyŋ tılı. Qazır sızderge jaǧdaiymnyŋ bärın qazaq tılınde jazyp otyrmyn.
Sonymen jiyrma jyldai memlekettık qyzmette jūmys ıstep, basşylyqtyŋ oŋ baǧalauynyŋ arqasynda Minskte, Briusselde jäne Äbu-Dabide Elşılıkterde qyzmet atqardym.
Körıp otyrǧandaryŋyzdai, qarapaiym auyl otbasynan şyqtym, eşqandai «jäke-kökem» joq, ömır jolymda Qūdai qoldap, ädıl adamdar köbırek jolyǧyp, elge qyzmet etıp, otbasyma adal asyn tauyp kelemın.
Qysqaşa ömırbaianym osyndai aǧaiyn, kelesı beine jazbalarda basqa da taqyryptardyŋ betın aşamyn.
2. Otbasym turaly
Jūbaiym Karinamen süiıp qosyldym. Anasy Janarǧa rahmet, bızdı qoldap, qyzyn öz qolymen ūzatty.
Karina ekeumız de äkesız jetım öskenbız, ekı jarty bır bütın boldyq.
Otbasy qūra salysymen Karina qūrsaq kötergende, Qūdai bızge jaq, bırden näreste berdı, qoldaǧany ǧoi dep qatty quandym.
Araǧa ekı jyl salyp, ūldyŋ ızın ala qyzymyz düniege keldı, özımızdı baqytty janūia sezındık.
Otbasy men üşın qai kezde bolmasyn bırınşı orynda boldy. Janūiamdy Allanyŋ amanaty dep qabyldap, olardyŋ bügını men erteŋıne barlyq jauapkerşılıktı tolyq sezınemın.
Ūlym men qyzym menıŋ ömırımnıŋ mänı, jalǧasy, şejırem emes pe!? Olardy qazaqi tärbiemen, imanǧa jaqyn, adal, bılımdı, meiırımdı etıp tärbieleudı armandadym.
Alaida, qazırgı ıs nasyrǧa şauyp, otbasymnyŋ şaŋyraǧy ortasyna tüskende, balalarymnyŋ taǧdyry ne bolady degen sūraq tün ūiqydan aiyryp, janymdy jegıdei jeidı.
Ajyrasqan soŋ, olardyŋ basqa erkektıŋ qas qabaǧyna qarap jaltaqtap, eŋsesı tüsıp, müsäpır küi keşerın közge elestetsem, jüregım qan jylaidy.
Ūl men qyzymdy Astanadaǧy üş bölmelı päterıme jaiǧastyryp, mektebıne, kiım keşegıne qarasyp tūramyn.
Äkesız ösken balanyŋ taǧdyry kelesı bırneşe ūrpaqqa terıs äser etpesıne kım kepıl?
Ūlymnan dopros alypty, endı ol özın ömır boiy kınälı sezınıp ötetının oilaǧan adam bolar ma eken?
Ūlym men qyzymnyŋ esı kırıp qaldy, «bız otbasyda tört adambyz, bırge tūruymyz kerek» deidı, olardy körmegelı köp boldy, saǧynyş özegımdı örteidı, olar da saǧynady äkesın, būl qalai bolǧany, men olardyŋ äkesı emespın be?
3. Materialdyq jaǧdai turaly
Zaiybym Karina menı ekonomikalyq zorlyq jasady dep aiyptady, soǧan orai bırqatar män-jailardyŋ basyn aşaiyn.
Ekeumız otbasy qūrǧaly ne jeimın, ne ışemın demedı, qalaǧan kiımın alyp berıp jüremın, şynyn aitqanda menen de jaqsy ömır sürdı. Otbasymda sen, men, senıkı, menıkı demedım, otbasym, jan jarym, bız, bızdıkı dep jürdım. Sebebı bız bırmız.
Karina ūzatylǧanda Qarjan auylyndaǧy bır-ekı jeŋgem «äi, qyzdyŋ jasauy, kiımı degen boluşy edı, eŋ bolmasa ydys-aiaq kelmedı artynan» degende, (äiel zatyn tüsınesızder ǧoi) «men mal mülık emes, jan jarymdy alyp jatyrmyn, būndai äŋgımenı qoiyŋyzdar» dep, toqtau salǧan edım.
2014 jyly Astanadan Briusselge 4 jylǧa keterde, ekeumız de bır qabat kiımmen bardyq, sol jaqta europalyq kiım-keşek aldyq.
Europanyŋ Karina qalaǧan köp jerın aralattym, Kanary, İspaniia, İtaliia, Gresiia, Kiprde aptalap demaldyq, Belgiiaǧa jaqyn Fransiia, Parij, Germaniia, Gollandiiaǧa qydyru körşı auylǧa baryp kelgendei bolatyn.
Esımde, Gresiiaǧa şuba aluǧa barǧanda, Karinaǧa bır şuba, maǧan bır jaǧaly palto alamyz dep josparlap, künı boiy aralap, bır qarasam Karinaǧa 6 myŋ evroǧa ekı şuba satyp alyppyz. Men özıme eşteŋe de almadym. Soǧan bola bersınşı, menıŋ jan jarym ǧoi dedım. Mūny aitqanǧa menı aiyptamaŋyzdar, maidalanyp otyr dep sökpeŋızder! Karinanyŋ öz jeke basyna qatysty ekonomikalyq jaǧdaidy köterıp otyrǧanyna aityp otyrmyn. Men odan eşteŋenı de aiaǧan emespın, aiamaimyn da.
Altyn brilliant degenderdı kemınde ekı üş qabattan taqty.
Qolynda jaŋa Aifon, mende samsung, köp jıgıtterde sondai-au osy.
Äbu-Dabide jürgende Karinada özınıŋ kredit kartasy boldy, qajetın satyp alyp jüretın. Tyrnaq ıstetetın jäne äielder baratyn basqa da salondarǧa baryp jürdı.
Üidıŋ är bölmesınde kosmetikanyŋ tür türı üiılıp jatatyn, makiiaj, vizaj degenderdı ūnatady, öz betıne ärtürlı suret salyp jüretın.
Muzykamen äuestenıp, olardy jüzdegen dollarǧa bırneşe ret satyp alyp, öleŋ jazyp, än şyǧardy, dauys jazu men aranjirovka da arzan emes.
Astanada jürgende aqyly akterlyq kurstarǧa baryp, özın aktrisa sezınıp jüretın. Aǧylşyn tılınıŋ jäne avto jürgızu kurstaryna bardy.
Aş qalǧan emes, künı boiy kuhnia men holodilnik öz qolynda, odan qalsa aptasyna kemınde 2-3 ret qalaǧa şyǧyp, restorandarda bırge tamaq ışemız. Özı 50 kilodan asyp ketse, semırıp kettım dep, dietaǧa otyratyn.
Dubaiǧa qydyru, şoping, pliaj, akvapark, okeanarium, tehnoparkter, zoopark, safari park, meiram nemese demalys künderı qonaqüilerge baru, restorandardan, otbasymnan aqşany aiamadym.
Üide tört adam bolsaq, jūbaiymnyŋ kiım-keşegı qalǧan üşeuımız - men, ūlym, qyzymdıkın qosqandaǧydan ekı ese köp şyǧar. Osy joly elge köşıp kelerde kiım keşek, oiynşyqtar, tehnika t.b. bärı 15 qorappen keldık, sonyŋ 8-9 qoraby Karinanyŋ kiım-keşegı.
Zaiybymnyŋ özı aityp jürgendei, Europada ailyq joǧary, keŋ jürdık, Astanada qarajat mol emes, körpemızge qarai kösıldık. Äbu-Dabide kün ystyq, jürek qysylady, köşede Europadaǧydai aşyq-şaşyq jüre almaisyŋ, aiyppūl salady. Bälkım būl män-jailar da jūbaiymnyŋ janyna batqan bolar.
4. Aqşa turaly
Jūbaiym Karina öz sözınde aqşa mäselesın köterıp öttı ǧoi, sondyqtan oǧan da tüsınık bere keteiın.
Qolym auzyma jetkelı jaqyndaryma kömektesıp, oǧan qosa qaiyr-sadaqa da berıp kelemın. Bır qolyŋ bergendı ekınşı qolyŋ bılmesın degendei, jariialamauşy edım. Tuysqan menıkı bolǧandyqtan, bauyrǧa kömektesetın uaqyttar bolady, kömegımdı beremın. Alaida, menıŋ tuysqandarymnyŋ bärı maǧan mäselesın artyp, jerge qarap otyrǧan jaiy joq. Käsıppen de, özderınıŋ şarualarymen de tyŋǧylyqty ainalysyp jür. Qūdaiǧa şükır, bärınıŋ de jaǧdaiy jaqsy.
Äuelı tuǧan auylymdaǧy jetım-jesır, mūqtajdarǧa azyq-tülık taratyp, 15-20 balaǧa mektepke sömke men forma, meiramdarda syilyq berıp jürdım. Bırneşe jyldan berı osylai kömegımdı körsetıp kelemın.
Osydan on jyldai būryn tanys jıgıtter «Şekteusız Ümıt» dep atalatyn DSP balalardy oŋaltu ortalyǧyn aşyp, sol kezden berı jyl saiyn aqşa audaryp kelemın. Jylyna 1000 dollar berıp tūramyn dep özıme planka qoiǧanmyn.
Aǧaiyn aǧamnyŋ şiettei mektep jasyndaǧy üş balamen jesır qalǧan 2-şı toptaǧy mügedek jeŋgemızdıŋ otbasyna da qol ūşyn sozyp tūramyn, aldyŋǧy jyly ipotekasyna 2 million teŋge qostym, oǧan qosa jylyna bırneşe ret taǧy jıberıp tūramyn. Ol jeŋgeme aituşy edım, menıŋ aqşa bergenımdı eşkımge aitpaŋyz, tıptı balalaryŋyz da bılmesın, özderın qaryzdar sezınıp, jasyq öspesın dep aityp ketemın.
Aǧaiyn-tuǧanǧa osylaişa qolǧabys körsetemın. Üş ret qaitarymsyz kömek bergenım esımde – anam rakpen auyrǧanda, äpkem operasiiaǧa tüskende, 7 balaly qaryndasym üi salamyn degende aqşa berdım, bärın qosqanda 4-5 million teŋge bolar.
«Jūbaiyŋnyŋ anasyna öz anaŋdai qara» degen bar, qaiyn jūrtyma üilengelı jyl saiyn qarajat berıp kelemın, eseptegenım joq, degenmen eŋ az degende 15-20 myŋ dollardan kem emes. Qaiyn enemnıŋ operasiiasyna, qaiyn äpkemnıŋ oquyna berdım, jäi järdem retınde de qolyna ūstattym. Qaiyn enem, özı jalǧyzbasty, rahmet aitqan kezde «maǧan Qūdai beredı, bermese sızge bere almas edım», sondyqtan alǧysty joǧary jaqqa aityŋyz dedım. Qaiyn enemdı Belgiiaǧa da, Äbu Dabige de biletın alyp berıp şaqyryp, qydyrtqanym bar.
Hoş, sonymen soŋǧy 1-2 jylda jūbaiym Karina qaiyr-sadaqaŋdy toqtat dei bastady. Karinaǧa «bızde Qūdaiǧa şükır jaǧdai jaqsy, qaiyr-sadaqa otbasymyzǧa sauap, qorǧan bolady, saǧan da, marqūm äkeŋe de tiedı» dedım.
Qaiyn enem maǧan «mesenat» dep mazaq at qoiyp, ol da qyzymen bırge qysym jasai bastady. Jalpy, qaiyn enem bızdıŋ otbasynyŋ ısterıne qatty aralasty. Ol kısı özı Reseide üide otyrady, bıraq bızdıŋ ūsaq tüiekter ısterımızge deiın özınıŋ aqyl-keŋesın aiamaidy.
Olarǧa qarjylyq mümkındıgım bolǧanyna şükır, qaltama qarap qaiyr berudı jalǧastyra beremın dedım. Bır jaǧynan, özımnen de bar şyǧar, qaiyr, sadaqa, qanaǧat degenderdı onyŋ jüregıne jetkıze almadym-au. Mümkın, menıŋ osy äreketterım de qatelık bolǧan şyǧar...
5. Otbasylyq kikıljıŋ turaly
Arydan bastasam, özım endı estıp jatyrmyn, qaiy nenem men jūbaiym byltyr köktemnen berı ajyrasuǧa şeşım qabyldap qoiǧan eken. Onysyn maǧan aitpaidy, bıldırmeidı, oinap külıp, daiyndalyp, qolaily sättı kütıp jürgendei.
Keiın oilap qoiam, būlar būrynnan ajyrasuǧa şeşım qabyldap, osy sättı yŋǧaily dep şeşıp, arandatuşy arnaiy operasiia jasaǧan ba dep. Oilap otyrsam denem türşıgıp, ordaly jylanǧa tap bolǧandai küi keşemın. Reseilıkter spes-operasiia jasauǧa master emes pe!?
Bız erkek baiǧūs aŋǧal kele me, älde men ǧana aŋqaumyn ba, jūbaiymnyŋ ondai köŋıl küiın tıptı baiqamappyn. Qalai aŋǧarasyŋ, äielıŋ eş şaǧymdanbastan, janyŋda oinap külıp jürse.
Byltyr jazda özı barǧysy kelgen İtaliiaǧa on künge aparyp, küzdegı tuǧan künıne brilliant jüzık pen altyn syrǧa syilap, biylǧy 8 martqa jergılıktı «Maldivy» dep ataityn araldaǧy qymbat villaǧa apardym. Men ajyrasu turaly oilasam, osyny jasar ma edım!?
Jūbaiym Karina reseilık azamattyqtan älı şyqpastan, oǧan qosa ūl-qyzymdy Reseige äketuge şeşesıne qūjat daiyndap qoiǧanyn aitty. Būl maǧan öte auyr tidı.
6. Qosymşa sūraqtar
Jūbaiym Karina interviude kötergen jekelegen sūraqtarǧa jauap beru qajet şyǧar.
Jynystyq zorlau turaly. Būl sūraq boiynşa qysqa qaiyrǧan jön bolar. Eşqandai jynystyq zorlau bolmaǧan. Erlı-zaiypty retınde qalypty qarym-qatynastar boldy.
Emosionaldyq zorlyq turaly. Mäselen, jylda 365 kün bolsa, sonyŋ ışınde 1-2 ret kışıgırım kikıljıŋ bolyp tūrǧan şyǧar, bır bırımızge renjıp, ökpelep jüretındei. Karina ışınde küizelıs, qorqynyş, yza, ökpe toldy dep maǧan bır aitpapty.
Bırese 10 jyl qorlyq kördım deidı, bırese 2018 jyldan bastaldy deidı. Onysyn qaidam, menen jaqsy ömır sürdı, jūmys ıstemeidı, ne jeimın, ne ışem demeidı, ülde men büldege oranyp jürdı.
«Nekuda bejat» deidı. Jyl saiyn Qazaqstanǧa kelıp tūratynbyz, anasy byltyr Äbu-Dabige keldı. Şetelde jürgende Elşı bar, basqa ärıptester bar, eşkımge aryzdanbaǧan. 2022 jäne 2023 jyldary jaz kezınde men Äbu Dabide jūmysta, Karina özı Astanada mensız ailap tūrdy, qolyn eşkım bailaǧan joq.
7. Közge şöp salu turaly
Jūbaiymnyŋ közıne şöp salmaǧanmyn. Būl zinaqorlyq, ülken künä. Karina negızsız kınälaǧan buhgalter ärıptesımnen keşırım sūraimyn, Karina menı qyzǧanǧan soŋ qate qorytyndy şyǧaryp, ol kelınşektı beker aiyptady. Mūny äielge tän qyzǧanyş dep qoiǧanmyn.
Menı bır alkogolge jaqyn adam etıp sipattaǧany ūiat boldy. Mende ışımdıkke degen bır qajettık joq, bırneşe jyldap tatyp almaǧan kezderım boldy. Kei-keide diplomatiialyq qabyldaularda, toi-tomalaqta bırlı jarym şarap bop tūrady.
Qyzǧanyş turaly. Qyzǧanyş sezımı jaqsy köretın erkekke tän emes pe, men bır bas salyp qyzǧanyp, bolar-bolmasqa jūbaiymdy qudalaǧan emespın.
Menıŋ äke şeşemnen bastap, aǧaiyndaryma da ǧaibat tıl tigızdı, ony bır Qūdai özı keşırsın. Aǧaiyndarym da aldaǧy uaqytta öz uäjderın aitatyn bolady. Kütıŋızder! Älı köp närse aitylady. Sebebı, bärın de aituǧa tura keldı.
8.Tūjyrym
Sürınbeitın tūiaq bolmaidy, ärbır otbasyda ydys aiaq syldyrlamai tūrmaidy. Otbasyn saqtau üşın ydys-aiaqtyŋ syldyryna sabyr saqtap qarap kelgen janmyn.
Özımdı sudan taza sütten aq deuden aulaqpyn, degenmen, otbasyda ekı eresek adam bolsa, bırı perışte, ekınşısı 100 paiyz kınälı bolatyn jaǧdai joqqa jaqyn şyǧar.
Qazır tergeu jürıp jatyr, sot kınälı dep tapsa, erkek toqty qūrbandyq degendei, jauapkerşılıkten qaşpaimyn.
Öz basym būl jaǧdaidy ömırdegı synaq dep qabyldap, barynşa sabaq aluǧa tyrysyp, tünnen keiın kün şyǧar dep ümıttenemın.
Saiyp kelgende, būndai jaǧdailar qazırgı qazaq qoǧamy üşın öte özektı bolyp tūrǧan siiaqty. Otbasynyŋ küireuı, bala şaǧanyŋ tırı jetım qaluy, bärı-bärı saldary orasan boluy yqtimal kürdelı mäsele ekenıne kelısetın şyǧarsyzdar.
Qazaq otbasynyŋ taǧdyry däl qazır bır jolairyqta tūrǧandai bolyp körınedı. Batys europalyq ülgıge ūmtylamyz desek, erlı-zaiyptylardyŋ ärqaisysynyŋ bölek biudjetı, janūia qūru krizisı, bala tuu körsetkışınıŋ kürt kemıp, europalyq deŋgeige qūldyrauy äbden mümkın. Būl bızdı tübı qūrdymǧa jıberedı.
Orysşa aitqanda «v suhom ostatke chto imeem?» demekşı, būndai ısterdıŋ tüp maqsaty otbasydaǧy tüsınıspeuşılıkter men kikıljıŋnen äieldıŋ ışıne jinalǧan emosionaldyq kegın alyp beru bolǧany ma?
Būl rette, kökeiımdı bırneşe sūraqtar mazalaidy:
• Bız nege otbasy mäselesınde qazaqtyŋ dästürlı amaldaryn ūmytyp kettık, myŋ jyldyq qūdalar, aqsaqaldar, aǧaiyngerşılık, aǧa-jeŋge, dos-jaran qaida qaldy?
• Bız nege biler soty, qoǧamdyq sot, ūjymdaǧy ärıptester, mediasiialyq tatulastyru syndy qoǧamdyq jūmsaq bilıktı qoldanbaimyz?
• Bız nege otbasynyŋ ışkı mäselelerın jar jahanǧa jariialap, odan haip quyp, tıptı läzzat aludy ädetke ainaldyrdyq?
• Bız nege otbasy institutynyŋ mänın tömendetıp, qoǧamnyŋ, halyqtyŋ asa maŋyzdy qūrauşy bölıgı ärı qūndylyǧyn keiıngı orynǧa qoiatyn boldyq?
• Bız nege ärbır janūiany nyǧaitudy, ornyqtyrudy, qoldaudy, jarastyrudy ūmytyp, mäselenıŋ sebebımen emes, saldarymen küresıp kettık?
• Bız nege balalardyŋ taǧdyry, tırı jetımdık, olardyŋ psihologiialyq travmalary, jalpy bügını men erteŋın bırınşı kezekte oilamaimyz?
• Bız nege ekı adam qatysatyn otbasylyq kikıljıŋde äieldıŋ rölın, tılı, sözı, qoly, tırlıgı, oi-piǧyly, tıptı keide provokasiiasy, basqa da ıs-qimyldaryn eskermeimız?
• Bız nege äkenıŋ otbasydaǧy asa maŋyzdy rölderın - otaǧasy, qorǧany, asqar tauy, berık qamaly märtebelerın ūmytyp baramyz?
Qūrmetpen:
Qazaqstan Respublikasynyŋ Bırıkken Arap Ämırlıkterındegı elşısınıŋ kömekşısı qyzmetın atqarǧan Säken Mamaş.
