Týǵan jer aldyndaǵy azamattyq paryzdy umytpaǵan jón

4971
Adyrna.kz Telegram

Aǵadyr kentinen júıitkigen kóligimiz shuńqyry kóp súrleý jolǵa tústi. Mań jazyq dalanyń sonaý kóz ushyndaı jerinde qaraýytqan shoqy tóbeler kólbeńdeıdi. Qazaǵymnyń keshegi surapyl tarıhtarynyń tańbalary osy dalany ábden aıǵyzdaǵany kórinip turǵandaı. Meniń qalyń oıǵa shomyp ketkenimdi baıqasa kerek, janymda otyrǵan ákem ıyǵyma qol salyp: «Bul – bizdiń týǵan jerimiz. Ata-babalarymyzdyń kindik tamǵan topyraǵy. Bul jer meniń, seniń, seniń balalaryńnyń maqtan tutarlyq mekeni bolýǵa tıis. Óıtkeni azamattyń maqtanarlyq týǵan jeri bolmasa, onda onyń óshkeni», dep kúrsindi. Meniń de kindik qanym osy jerge tamǵan. Alaıda áke-sheshem jumys babymen Almatyǵa kóship, bul aımaqqa jylyna bir ret qana taban tireıtinbiz. Onda da, bala kúnimizde kóp ýaqyt júretinbiz. Keıin ýaqyt óte kele bul qystaqqa at basyn burýdy azaıttyq. Emis-emis esimde qalǵany keń jaılaý men qoraly qoı, jaıylǵan jylqy...Kún uzaq asyq oınap, dop tebetinbiz. Kún tas tóbege kóterilgen shaqta jaılaýdaǵy balalar ózenge shomylýǵa baratynbyz. Kóz aldymnan kólbeńdegen osy kórinisterden boıymdy saǵynysh bılegenin baıqamaı da qaldym.
Bizdi qushaq jaıa qarsy alǵan kisini dóp basyp tanı almadym. Ákemmen arqa-jarqa amandasqan ol maǵan burylyp: «Azamat boldy degen osy! Týǵan jerdiń topyraǵy tartar dep edim. Kelgenińe óte qýanyshtymyn», dep meni baýyryna qysty. Meniń tosyrqap turǵanymdy baıqasa kerek, ákem: «Bul – ataqty Sáken Seıfýllınniń urpaǵy, jalǵasy, tútinin sóndirmeı otyrǵan úlken azamat», dep tanystyrdy. «Aǵadyrǵa kelseń, mundaǵy barlyq qazaq Sákenniń urpaǵymyz dep maqtana, marqaıa aıtady» dep kúldi Azamat aǵa. Aldaǵy eki apta ýaqytym osy Azamat aǵanyń janynda ótti. Azamattyń azamattyǵyna tánti boldym. Talaı kitap oqydym, talaıdy bilemin degenim Azamat aǵanyń qasynda túk bolmaı qaldy. Bizdiń ata-babalarymyz ben olarǵa qatysty tarıhı málimetterdi aıtqanda, Azamat aǵa aýzyna qaratady eken. Solardyń eń qyzyqtysy – Sáken Seıfýllınge qatystysy boldy. Sáken Seıfýllınniń qazaq tarıhyndaǵy aty men ómir joly bárine belgili ǵoı. Alaıda Sákenniń týǵan jerine degen erekshe sezimi týraly derekter sırek. Azamat aǵanyń aıtýynsha, Sáken Seıfýllın osy qystaqta, qazirgi Qarashilik qystaǵynda kóp shyǵarmany dúnıege ákelipti. Sonaý jerlerde áldekim ádeıi shashyp ketkendeı qoıtastar jatyr. Mine, osy qoıtastar Sákenniń súıikti mekeniniń biri bolypty. Sáken qýǵynda júrgende jasyrynyp jatqan úńgirdi de kórdik. Eliniń erteńi úshin basyn ólimge tikken arda azamatymyz osy úńgirde jatyp ne oılady eken? El aýzynda Sáken qystaǵy atalǵan bul jer meni ózine birden baýrap aldy. Bálkim, kindik qanym tamǵan kıeli meken bolǵandyqtan da, osy mekenge jipsiz baılanǵan bolarmyn. Desek te, endigi ómirimdi týǵan jerimniń tórinde, tarıhı syrǵa qoıny tolǵan Qarashilikte jalǵastyrýdy jón sanadym. Óıtkeni, men Alashtyń ardaqty azamaty Sákenniń qazirgi urpaǵynyń birimin. Meniń endigi azamattyq boryshym – osy týǵan jerimdi gúldendirýge, osy mekendi jerdiń jánnatyna aınaldyrýǵa kúsh salý bolmaq. Sákendeı alyp tulǵany tanytqan jer – meniń de maqtanyshyma aınalary sózsiz. Osyndaı oımen mań dalaǵa jaıǵasqan Qarashilikke týymdy tiktim. Óıtkeni bul – týǵan jer aldyndaǵy meniń azamattyq boryshym.

Oljas Smaǵulov 
Bul maqala Azamattyq bastamalardy qoldaý ortalyǵynyń

«Týǵan jer» granttyq jobasy aıasynda jazyldy.

"Adyrna" ulttyq portaly

Pikirler