Memleket basshysy – Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaev jıynǵa qatysýshylardy Otan qorǵaýshy kúnimen jáne alda kele jatqan Jeńis kúni merekesimen quttyqtap, osy eki meıram jaýyngerlik dástúrdiń sabaqtastyǵyn pash etetinin, batyr babalarymyzdyń dańqty jolyn qazir óskeleń urpaq jalǵastyryp kele jatqanyn atap ótti. Bul týraly Aqorda jarııalady, dep habarlaıdy “Adyrna” ulttyq portaly.
«Búginde aıbyndy armııamyz – eldegi tutastyq pen tynyshtyqtyń myqty qalqany. Qýatty áskerimiz beıbitshilik pen berekeli ómirdi qas qaqpaı kúzetip tur. Olar qaı kezde de qasterli Otanymyzdy qorǵaýǵa daıyn. Erlik maıdanda ǵana jasalmaıdy. Erlikke beıbit zamanda da oryn bar. Bıyl biz sońǵy 80 jyldaǵy eń joıqyn tasqynǵa tap boldyq. Elge qater tóngen sátte sarbazdarymyz aldyńǵy shepten tabyldy. Ulttyq ulan, Ishki ister mınıstrligi, Ulttyq qaýipsizdik komıteti, Tótenshe jaǵdaılar mınıstrligi jáne Memlekettik kúzet qyzmetiniń jeke quramy antqa adal bolýdyń úlgisin kórsetti. Alapat tasqynǵa tótep berý úshin 9 myńnan astam áskerı qyzmetshi jumyla eńbek etti. Myńnan astam tehnıka jetkizildi. Syn saǵatta halqymyzdyń asyl qundylyqtary anyq baıqalady. Osy oraıda Soltústik Qazaqstan oblysynda apatqa qarsy kúresken 300 sarbazdyń eńbegin erekshe atap ótkim keledi. Olar kúni-túni bógen salyp, qalany qarǵyn sýdan qutqarýǵa atsalysty. Jergilikti turǵyndar bul sarbazdarǵa aıryqsha rıza boldy, olardy zor qurmetpen shyǵaryp saldy. Mine, halyq pen armııanyń myzǵymas tutastyǵy degenimiz – osy. Mundaı mysaldar az emes», – dedi Prezıdent.
