Tájikterdiń basqa elderde jasaǵan lańkestik áreketteriniń sany kóbeıip, memleket basshysynyń nazaryn aýdartty, dep habarlaıdy "Adyrna" tilshisi Azııa plıýske siltep.
Emomalı Rahmon naýryzda qoǵam ókilderimen jáne din qaıratkerlerimen kezdesýinde lańkesterdiń memleket bedeline kir keltirip júrgenin aıtty.
Memleket basshysynyń baspasóz qyzmetiniń habarlaýynsha, úsh jylda álemniń 10 elinde Tájikstannyń 24 azamaty lańkestik áreketter jasaǵan. Odan bólek kópshilik ishinde óz-ózin jaryp jibergender de bar.
Prezıdent óz-ózine qol jumsaý – ıslam dininiń negizderine qaıshy keletin kúná ekenin eske saldy.
10 jyl ishinde tájik azamattarynyń tarapynan ekstremıstik jáne terrorıstik sıpattaǵy 6680 qylmys anyqtalyp, tirkelgen.
«Tek 2023 jyldyń ózinde zańsyz dinı bilim berýdiń 300 faktisi anyqtalyp, balalardyń, jasóspirimder men jastardyń mıyn ýlaý maqsatynda 4100-den astam adamnyń qatysýymen jıyndardyń ótkeni teris aǵymnyń kúsheıgenin kórsetedi», - dedi Emomalı Rahmon.
Sońǵy bir jylda tájikterdiń radıkaldy toptarmen baılanysy nemese lańkestik áreketterge qatysy bar 10-ǵa jýyq oqıǵa tirkelgen.
Atap aıtqanda, bul Iran, Germanııa, Nıderlandy, Qazaqstan jáne basqa elderdegi shabýyldar men jarylystarǵa qatysty. Olardyń keıbiri qamaýǵa alyndy, basqalary lańkestik shabýyldarda qaza tapty.
