Qandaı keńesti tyńdaýǵa bolmaıdy?

3514
Adyrna.kz Telegram

Barlyq adamnyń aınalasynda aqyl-keńes beretinder jeterlik. Onyń bárin tyńdaý kerek pe?

Durys ári problemasyz ómir súrýdiń arnaıy shemasy joq. Sondyqtan da, baqyt pen otbasy jarasymdylyǵyn, aqshany, densaýlyqty saqtaý jónindegi keńester árbir adamǵa qajet-aq. Áıtse de, kimniń aıtqan aqyly men qandaı keńesti tyńdamaý kerektigin de bilgen jón. Ómir jolynda ár túrli jaǵdaıǵa tap bolyp, ony sheshýdiń jolyn tappaı basymyzdy taýǵa da, tasqa da uryp jatamyz. Mundaıda bireýden keńes suraımyz, al taǵy bireý suramasaq ta aqylyn aıtady. Qulaq asqan durys pa? Qazaqta eń jaman qarǵys bar: «Óziń bilme, bilgenniń tilin alma» degen. Máseleńizdi sheshýdi ózińiz bilmeısiz be, biletindi tyńdańyz. Bir bastan eki bas jaqsy. Aınalańyzdaǵy adamdardyń aqyl-keńesin tyńdańyz, biraq kez kelgen keńesti aldymen saralap, oı tarazysyna salyp kórińiz. Óıtkeni, ár adamnyń ómir joly, otbasy tárbıesi, ortasy, ómir súrý salty, túsinigi túrlishe. Bolǵan bir jaǵdaıǵa eki adamnyń bireýi optımıstik kózqaraspen qarasa, ekinshisi pessımıstik kózqarasta bolady. Bul – aqıqat! Sondyqtan da, aıtylǵan árbir keńeske kóz jumyp kirisip ketýge asyqpańyz. Elekten ótkizip baryp, sosyn ǵana qajetińizge jaratýdy oılańyz.

Al, mynandaı adamdardyń aqyl-keńesin tyńdap ýaqyt shyǵyndamaı-aq qoıyńyz. OLAR KIMDER?

Psıholog mamandar myna adamdardyń keńesi adastyrady, shatastyrady deıdi:

Qaryzǵa batyp júrgen adamnyń baıýdyń joldary týraly keńesi

Semiz adamnyń aryqtaý jóninde keńesterin, ne jeý, ne jemeý kerek ekenin aıtqan aqyly, qalaı aryqtaý týraly usynǵan dıetasy

Temeki shegetin dárigerdiń densaýlyqty nyǵaıtý týraly keńesi

Joly bolmaǵan, eshnársege qol jetkizbegen adamnyń jetistikke jetkizetin keńesi

Quranda neshe súre bar ekenin, barlyq súreniń ataýyn bilmeıtin din qyzmetkeriniń nasıhaty

Ózge týraly kóp ósek aıtatyn adamnyń aqyly

Sózińizdi sońyna deıin tyńdamaı ózi sóıleı beretin adamnyń aıtqany

Otbasy qurmaǵan adamnyń áıel men erkek arasyndaǵy qarym-qatynasty jaqsartý jónindegi keńesi

Balasy joq adamnyń bala tárbıesi týraly aqyly

Kúıeýi joq áıeldiń erkekpen qalaı durys baılanys qurý, qalaı turmysqa shyǵý jaıly keńesi...

Sonymen qatar, ózińiz de bireýge aqyl aıtarda osy krıterıılerdi nazarda ustaǵanyńyz abzal. Árıne, barlyq adamǵa keńes bere alasyz, biraq sol keńesti ómirde qoldanatyn aqyl-oıdy oǵan bere almaısyz. Menińshe, eger, ózi suramasa eshkimge aqyl aıtyp, keńes berýdiń qajeti joq. Al, siz qalaı oılaısyz, oqyrman? (sýretter ashyq derekkózderden alyndy)

 

J. SMAǴULOVA

"Adyrna" ulttyq portaly

Pikirler