قانداي كەڭەستى تىڭداۋعا بولمايدى؟

2596

بارلىق ادامنىڭ اينالاسىندا اقىل-كەڭەس بەرەتىندەر جەتەرلىك. ونىڭ ءبارىن تىڭداۋ كەرەك پە؟

دۇرىس ءارى پروبلەماسىز ءومىر ءسۇرۋدىڭ ارنايى سحەماسى جوق. سوندىقتان دا، باقىت پەن وتباسى جاراسىمدىلىعىن، اقشانى، دەنساۋلىقتى ساقتاۋ جونىندەگى كەڭەستەر ءاربىر ادامعا قاجەت-اق. ايتسە دە، كىمنىڭ ايتقان اقىلى مەن قانداي كەڭەستى تىڭداماۋ كەرەكتىگىن دە بىلگەن ءجون. ءومىر جولىندا ءار ءتۇرلى جاعدايعا تاپ بولىپ، ونى شەشۋدىڭ جولىن تاپپاي باسىمىزدى تاۋعا دا، تاسقا دا ۇرىپ جاتامىز. مۇندايدا بىرەۋدەن كەڭەس سۇرايمىز، ال تاعى بىرەۋ سۇراماساق تا اقىلىن ايتادى. قۇلاق اسقان دۇرىس پا؟ قازاقتا ەڭ جامان قارعىس بار: «ءوزىڭ بىلمە، بىلگەننىڭ ءتىلىن الما» دەگەن. ماسەلەڭىزدى شەشۋدى ءوزىڭىز بىلمەيسىز بە، بىلەتىندى تىڭداڭىز. ءبىر باستان ەكى باس جاقسى. اينالاڭىزداعى ادامداردىڭ اقىل-كەڭەسىن تىڭداڭىز، بىراق كەز كەلگەن كەڭەستى الدىمەن سارالاپ، وي تارازىسىنا سالىپ كورىڭىز. ويتكەنى، ءار ادامنىڭ ءومىر جولى، وتباسى تاربيەسى، ورتاسى، ءومىر ءسۇرۋ سالتى، تۇسىنىگى تۇرلىشە. بولعان ءبىر جاعدايعا ەكى ادامنىڭ بىرەۋى وپتيميستىك كوزقاراسپەن قاراسا، ەكىنشىسى پەسسيميستىك كوزقاراستا بولادى. بۇل – اقيقات! سوندىقتان دا، ايتىلعان ءاربىر كەڭەسكە كوز جۇمىپ كىرىسىپ كەتۋگە اسىقپاڭىز. ەلەكتەن وتكىزىپ بارىپ، سوسىن عانا قاجەتىڭىزگە جاراتۋدى ويلاڭىز.

ال، مىنانداي ادامداردىڭ اقىل-كەڭەسىن تىڭداپ ۋاقىت شىعىنداماي-اق قويىڭىز. ولار كىمدەر؟

پسيحولوگ ماماندار مىنا ادامداردىڭ كەڭەسى اداستىرادى، شاتاستىرادى دەيدى:

قارىزعا باتىپ جۇرگەن ادامنىڭ بايۋدىڭ جولدارى تۋرالى كەڭەسى

سەمىز ادامنىڭ ارىقتاۋ جونىندە كەڭەستەرىن، نە جەۋ، نە جەمەۋ كەرەك ەكەنىن ايتقان اقىلى، قالاي ارىقتاۋ تۋرالى ۇسىنعان ديەتاسى

تەمەكى شەگەتىن دارىگەردىڭ دەنساۋلىقتى نىعايتۋ تۋرالى كەڭەسى

جولى بولماعان، ەشنارسەگە قول جەتكىزبەگەن ادامنىڭ جەتىستىككە جەتكىزەتىن كەڭەسى

قۇراندا نەشە سۇرە بار ەكەنىن، بارلىق سۇرەنىڭ اتاۋىن بىلمەيتىن ءدىن قىزمەتكەرىنىڭ ناسيحاتى

وزگە تۋرالى كوپ وسەك ايتاتىن ادامنىڭ اقىلى

ءسوزىڭىزدى سوڭىنا دەيىن تىڭداماي ءوزى سويلەي بەرەتىن ادامنىڭ ايتقانى

وتباسى قۇرماعان ادامنىڭ ايەل مەن ەركەك اراسىنداعى قارىم-قاتىناستى جاقسارتۋ جونىندەگى كەڭەسى

بالاسى جوق ادامنىڭ بالا تاربيەسى تۋرالى اقىلى

كۇيەۋى جوق ايەلدىڭ ەركەكپەن قالاي دۇرىس بايلانىس قۇرۋ، قالاي تۇرمىسقا شىعۋ جايلى كەڭەسى...

سونىمەن قاتار، ءوزىڭىز دە بىرەۋگە اقىل ايتاردا وسى كريتەريلەردى نازاردا ۇستاعانىڭىز ابزال. ارينە، بارلىق ادامعا كەڭەس بەرە الاسىز، بىراق سول كەڭەستى ومىردە قولداناتىن اقىل-ويدى وعان بەرە المايسىز. مەنىڭشە، ەگەر، ءوزى سۇراماسا ەشكىمگە اقىل ايتىپ، كەڭەس بەرۋدىڭ قاجەتى جوق. ال، ءسىز قالاي ويلايسىز، وقىرمان؟ (سۋرەتتەر اشىق دەرەككوزدەردەن الىندى)

 

ج. سماعۇلوۆا

"ادىرنا" ۇلتتىق پورتالى

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket