Ulytaý oblysynda asyrap alǵan balalaryn bes jyl boıy sharýashylyq fermada jumys kúshi retinde paıdalanǵan ógeı ana qamaýǵa alyndy. Bul týraly Qazaqstandaǵy bala quqyqtary boıynsha ýákil Dınara Zakıeva Instagram paraqshasynda málimdedi, dep habarlaıdy “Adyrna” ulttyq portaly.
Dınara Zakıeva aqpannyń basynda oblystyq prokýratýra men qamqorshy ókilderden quralǵan mobıldik top bir otbasynyń úsh balasyn – bir qyz ben eki uldy tapqanyn aıtqan edi. Olardy ógeı ana balalar úıinen 2018 jyly asyrap alǵan. Ol kezde balalar 14, 12, 8 jasar bolǵan.
Úlkenderine qaladan 20 shaqyrym jerdegi fermada mal baqtyrǵan. Ombýdsmenniń sózinshe, komıssııa músheleri fermaǵa kelip, balalardyń qandaı jaǵdaıda ómir súrip jatqanyn kórip shoshyǵan. Olardyń denesi kógerip, tilingen, azyp-tozyp, sharshaǵan, ash, kóz janary solǵan, kir-qojalaq, kıimderi jyrtyq.
Tekserý barysynda ulytaýlyqtyń 3 bala úshin járdemaqy alyp kelgeni de anyqtaldy.
"Balalardyń úlkeni – qyz, kolledjdi támamdaǵan, alaıda is júzinde sabaqqa múlde barmaǵan. Ortanshy ul kolledjde "oqıdy". Quqyq qorǵaý organdary bilim mekemesin tekserse, ata-anasy únemi balalardyń aýyrǵany týraly anyqtama berip otyrǵan eken. Qamqorshy qyzdy jumys istemeseń, ne shaǵymdansań, baýyrlaryńdy kórmeısiń dep qorqytqan", – dep jazdy Zakıeva.
Bul tekserýge Ulytaý oblysy ákimi Berik Ábdiǵalıuly, prokýratýra, IIM atsalysqan. Is barysynda qamqorshynyń jaqynda taǵy da "patronatqa alýǵa bolatyn basqa da balalar bar ma?" dep surastyrǵany anyqtaldy.
Sonymen qatar, bala quqyqtary jónindegi ýákil qazir IIM, Prokýratýra men basqa da memlekettik organdar birlesip búkil el boıynsha pılottyq rejımde jumys isteıtin mobıldi toptar qurylǵanyn aıtty.
