Jezqazǧan qalasynyŋ Qabanbai batyr şaǧynaudanynda boi kötergen 300 oryndyq jaŋa mektep ortalyqtandyrylǧan gaz jelısıne qosyldy. Būl bastama – öŋırde ekologiialyq qauıpsızdıktı qamtamasyz etıp, äleumettık nysandardy üzdıksız jylumen qamtuǧa baǧyttalǧan jüielı jūmystardyŋ jalǧasy.
Atalǧan şaraǧa Ūlytau oblysynyŋ äkımı Dastan Ryspekov pen «Qazaqgaz» ŪK AQ Basqarma töraǧasy Sanjar Jarkeşov arnaiy qatysty.
Öz sözınde öŋır basşysy gazdandyru ısınıŋ öŋır ekologiiasy men tūrǧyndardyŋ tūrmys sapasyn arttyrudaǧy maŋyzyna toqtaldy.
— «Gazdandyru jobasy – ekologiialyq tūrǧydan öte paidaly. Ol qorşaǧan ortaǧa keletın ziiandy qaldyqtardy azaityp qana qoimai, jylu tapşylyǧyn boldyrmauǧa mümkındık beredı. Ötken jyly bız Talap auylyndaǧy mekteptı kögıldır otynǧa qosyp, qys mezgılın sättı ötkerdık. Bügınde oblys ortalyǧyndaǧy özge de äleumettık nysandardy kezeŋ-kezeŋımen gaz jelısıne qosudy qolǧa alyp otyrmyz. Sonyŋ bırı – osy jaŋa bılım oşaǧy», – dedı oblys äkımı Dastan Ryspekov.
Aita keteiık, qazırgı taŋda Jezqazǧan qalasynda 4000 abonentke gaz jelısı tartylyp, onyŋ 2000-y kögıldır otyndy tūtynyp otyr. Būdan bölek, Keŋgır auylynda, Jäirem kentınde jäne Jaŋaarqa audanynda da gazdandyru jobalary jüzege asyryla bastady.
Aldaǧy uaqytta Ūlytau oblysynda äleumettık nysandarmen qatar, jeke tūrǧyn üilerdı de kezeŋ-kezeŋımen gazdandyru josparlanyp otyr. Osyǧan bailanysty oblys äkımı men «Qazaqgaz» kompaniiasy ökılderınıŋ qatysuymen arnaiy jiyn öttı. Keŋeste gazdandyru ısın odan ärı jandandyru, qosymşa gaz kölemın beru, sondai-aq onyŋ öŋırdegı şaǧyn jäne orta biznestı damytudaǧy rölı talqylandy.
Qos tarap yntymaqtastyqta äreket ete otyryp, gazdandyru jobalaryn tūraqty türde jüzege asyruǧa jäne halyqqa qolaily jaǧdai jasauǧa niettı ekendıkterın atap öttı.
