Májilis depýtaty Dáýlet Muqaev áleýmettik saladaǵy jemqorlyq týraly sóz qozǵady. Bul týraly ol májiliste áleýmettik saladaǵy jemqorlyq týraly ótken otyrysta aıtty, dep habarlaıdy “Adyrna” ulttyq portaly.
"Bala dúnıe kelgennen bastap adam qaıtys bolǵanǵa deıingi kezeńdi jemqorlyq jaılaǵan. Qudaı saqtasyn, adam ólse, Almatydaǵy taýdyń mańaıy, "Keńsaı" zıratynyń mańaıynan jer izdeıdi. Bala dúnıege keletin kezde jaqsy dáriger, perzenthana kerek dep sabylady. Sosyn balabaqsha, mektep bastalady. Bala ýnıversıtetke barady. Osydan soń ol úılenip, otbasy bolady. Osy kezde olarǵa úı kerek. Ony alý úshin úıdiń kezegine turý qajet. Jumysqa ornalasady. Osy salanyń bárinde jemqorlyq", - deıdi Muqaev.
Májilis depýtatynyń aıtýynsha, oǵan Qyzylorda oblysy men Shymkent qalasynyń turǵyndarynan kóp hat túsedi eken.
"Mysaly, jaı ǵana eden jýýshy bolyp jumysqa ornalasý úshin 500 myń teńge suraıdy. Muǵalimderdiń stavkasy 1-1,5 mln teńge bolyp ketken. Ondaı hattar óte kóp", - deıdi depýtat.
Sondaı-aq, ol hat ıelerine Antıkorǵa habarlasýǵa keńes beredi.
"1424 nómirin de beremin. Endi sol 1424-ke habarlasqanda, algorıtm qalaı jumys isteıdi? Antıkor ne isteıdi, túsindirip berińizshi", - dep surady Muqaev Antıkor ókilinen.
Sybaılas jemqorlyqqa qarsy is-qımyl agenttigi prevenııa qyzmetiniń basshysy Saıan Ahmetjanovtyń aıtýynsha, 1424 nómirine táýlik boıy habarlasýǵa bolady.
"Osyndaı fakti naqty bolsa, onyń aryzy tirkelýi kerek. Ol adam aryz jazýy kerek. Jaı aıta salýǵa bolmaıdy. Bul taldaý emes, qylmystyq is bolyp sanalady. Osyǵan sáıkes jedel tergeý júrgizý shart. Mundaı jaǵdaı anyqtalsa, qylmystyq is tirkelip, tergeý bastalady. Oǵan esh kúmán bolmaý kerek. Ondaı aqparat tússe, tolyq jaýap berýge daıynbyz", - dedi Ahmetjanov.
Osy oraıda depýtat Muqaev Antıkor ókilinen habarlasqan adamnyń anonımdiligine kepildik berile me dep surady. Óıtkeni, aıtýynsha, kóp adam qorqady.
"Anonımdi fakti bolsa, ondaı jaǵdaıda biz faktini taldaýǵa alamyz. Muny kim aıtty, derek qaıda tirkeldi, qaı memlekettik organ, ol mektep pe, balabaqsha ma? Ony anyqtaýǵa bolady. Alaıda qylmystyq isti qozǵaý úshin aryzdanýshy bolýy kerek", - dedi Ahmetjanov.
