Shyǵys Qazaqstanda 3 ákim jaýapqa tartyldy. Sebebi Shemonaıha aýdanynda memlekettik satyp alý týraly tikeleı sharttar zańsyz jasalǵany anyqtalǵan, dep habarlaıdy "Adyrna" tilshisi.
ShQO Bas prokýratýrasynyń málimetinshe, ákimder óz jumysyna salǵyrt qaraǵan.
"Jekelegen ákimder "Memlekettik satyp alý týraly" zańnyń 39-baby 3-tarmaǵy 42-tarmaqshasynda kórsetilgen erejeni buzǵan. Olar satyp alý kezinde bir ǵana jumystyń qunyna toqtalyp (3000 AEK-ten aspaıtyn), jumystyń birtektilik jaıly qoıylatyn talaptaryn ádeıi elemegen", - dep jazylǵan vedomstvo habarlamasynda.
Iaǵnı, Shemonaıha qalasy ákiminiń apparaty qysqy jol jóndeý jumystaryn júrgizýge jalpy somasy 27,2 mln teńgege 3 shart jasasypty. Jumystyń sıpaty birtekti, biraq bul rette jalpy quny 3000 AEK-ten asqanyn eskere otyryp, bul satyp alýlar básekelestik ortada júzege asyrylýy kerek bolǵan.
"Osyndaı zań buzýshylyqtarǵa Zevakın jáne Vavılon aýyldyq okrýgteriniń ákimderi de jol bergen. Prokýrorlyq qadaǵalaý aktisi boıynsha Shemonaıha qalasy, Zevakın jáne Vavılon aýyldyq okrýgteriniń ákimderi ákimshilik jaýapkershilikke tartylyp, árqaısysyna 100 AEK mólsherinde aıyppul salyndy", - delingen Bas prokýratýra joldaǵan habarlamada.
