شىعىس قازاقستاندا 3 اكىم جاۋاپقا تارتىلدى. سەبەبى شەمونايحا اۋدانىندا مەملەكەتتىك ساتىپ الۋ تۋرالى تىكەلەي شارتتار زاڭسىز جاسالعانى انىقتالعان، دەپ حابارلايدى "ادىرنا" ءتىلشىسى.
شقو باس پروكۋراتۋراسىنىڭ مالىمەتىنشە، اكىمدەر ءوز جۇمىسىنا سالعىرت قاراعان.
"جەكەلەگەن اكىمدەر "مەملەكەتتىك ساتىپ الۋ تۋرالى" زاڭنىڭ 39-بابى 3-تارماعى 42-تارماقشاسىندا كورسەتىلگەن ەرەجەنى بۇزعان. ولار ساتىپ الۋ كەزىندە ءبىر عانا جۇمىستىڭ قۇنىنا توقتالىپ (3000 اەك-تەن اسپايتىن), جۇمىستىڭ بىرتەكتىلىك جايلى قويىلاتىن تالاپتارىن ادەيى ەلەمەگەن", - دەپ جازىلعان ۆەدومستۆو حابارلاماسىندا.
ياعني، شەمونايحا قالاسى اكىمىنىڭ اپپاراتى قىسقى جول جوندەۋ جۇمىستارىن جۇرگىزۋگە جالپى سوماسى 27,2 ملن تەڭگەگە 3 شارت جاساسىپتى. جۇمىستىڭ سيپاتى بىرتەكتى، بىراق بۇل رەتتە جالپى قۇنى 3000 اەك-تەن اسقانىن ەسكەرە وتىرىپ، بۇل ساتىپ الۋلار باسەكەلەستىك ورتادا جۇزەگە اسىرىلۋى كەرەك بولعان.
"وسىنداي زاڭ بۇزۋشىلىقتارعا زەۆاكين جانە ۆاۆيلون اۋىلدىق وكرۋگتەرىنىڭ اكىمدەرى دە جول بەرگەن. پروكۋرورلىق قاداعالاۋ اكتىسى بويىنشا شەمونايحا قالاسى، زەۆاكين جانە ۆاۆيلون اۋىلدىق وكرۋگتەرىنىڭ اكىمدەرى اكىمشىلىك جاۋاپكەرشىلىككە تارتىلىپ، ارقايسىسىنا 100 اەك مولشەرىندە ايىپپۇل سالىندى", - دەلىنگەن باس پروكۋراتۋرا جولداعان حابارلامادا.