«Koronavirustyŋ ekınşı tolqyny kele jatyr» dep elımızdıŋ Densaulyq ministrı soŋǧy künderı aqparat betterınen tüspei tūr. Al Qazaqstandaǧy keibır şeneunıkter jaŋa jyldyq daiyndyqqa kırısıp ketıptı. Pandemiia dep jantalasqan uaqytta şyrşa bezendırıp, jaŋa jyldy otşaşumen qarsy alu... Qisynǧa kele me? Qazaqstanda bärı de mümkın.
Koronavirusqa jūrt kümän keltırse, bilıktegıler jatyp kelıp «renjidı». Al endı şeneunıkterdıŋ şyrşa ızdep, jaŋa jylǧa daiyndalǧanyna qarasaŋ, «koronavirus saiasi oiyn» degen jel söz ras pa dep te qalasyz. Nege deseŋız, Memlekettık satyp alu portalynda soŋǧy uaqytta jaŋa jyldy qarsy alu şaralaryna bailanysty tapsyrystar az tüspeptı. Būl turaly kznews.kz aqparattyq saity Euraziia arnasyna sılteme jasap habarlady.
Indettıŋ ekınşı tolqyny kele jatyr degen Soi ötırıkşı sekıldı körınedı mynau tapsyrystarǧa qarasaŋyz. Sebebı, ministr aitqandai, ekınşı alapat auru tolqyny kele jatsa, şeneunıkterımız nesıne jetısıp, şyrşa ızdep jatyr?
Mysaly Qaraǧandydaǧy №23-mektep mūndai äzırlıktı mausym-şılde ailarynda bastaǧan. Al būl uaqytta bızdıŋ el ölım-jıtımnen endı-endı es jiyp jatqan edı. Memlekettık satyp alu saityndaǧy şyrşaǧa berılgen tapsyrys būl sözımızge aiǧaq bola alady. Bıraq mektep direktory būl turasynda büi deidı.
«Şyrşany satyp alu jaŋa jylǧa daiyndyq bastady degen söz emes, ol bolaşaqqa josparlanǧan jūmys. Ekınşıden, şyrşany memlekettık satyp aludyŋ baǧa ūsynuy boiynşa ötkızıldı. Alǧaşqy berılgen baǧa 714 myŋ teŋge. Konkursqa 5 jabdyqtauşy qatysty. Sonyŋ ışınde eŋ tömengı baǧa bergen 446 555 teŋge», – dedı №23 mekteptıŋ direktory Nūrken Aşyqbaev.
Balqaş qalasynyŋ äkımdıgıne qarasty Tūrǧyn-üi kommunaldyq şaruaşylyǧy jönındegı bölım de qysqa daiyndyqty äldeqaşan bastap ketken. Qalany estetikalyq bezendıruge baqandai 13 million teŋgesın şytyrlatyp sanap beruge daiyn.
Taldyqorǧan qalasynyŋ äkımdıgı de şahar ortalyǧyn odan saiyn äsemdeu üşın 10 million teŋge bölgelı otyr. Sondai-aq qar tüspei jatyp, qysqa qamdanǧandardyŋ bırı – Nūr-Sūltan qalasynyŋ Baiqoŋyr audany. Ǧimarattardy bezendıruge bölıngen 17 million somany äkımdıktegıler bylaişa aqtauǧa tyrysty.
«Seifullinnıŋ boiynda būrynǧy bazar bolǧan jerde 5 üi salyndy ǧoi. Äleumettık jaǧdaiy tömen otbasylarǧa berıldı. Eşqandai jaŋa jyldyŋ daiyndyǧy emes. Jaŋa jylǧa tük qatysy joq. Byltyr bölıngen aqşa. Üi salynyp jatqanda sondai bezendıruge qosymşa aqşa bölınedı. Qyzyl jasyl ärtürlı svetterı bar. Ondai körıp jürsızder ǧoi, qalada bükıl jerde bar», – dedı Baiqoŋyr audany äkımınıŋ orynbasary Erlan Jaulybaev.
Jūrt janyn şüberekke tüiıp, mynau ındetten qalai aman şyǧudy uaiymdap otyrǧanda, üilerdıŋ syrtyn bezendırıp, şyrşa alyp, «bolaşaqqa daiyndalǧan» atqamınerlerdıŋ būl äreketıne erıksız «Bärekeldı!» degennen basqa ne aituǧa bolady? Bylaiǧy jūrt karantinnen jūmyssyz qalyp, ükımettıŋ itke süiek tastaǧandai etıp bergen 42500 teŋgesıne telmırıp otyr. Al qolynda bilık tızgını bar özgelerı şyrşa men oiynşyqtar alyp, «svettermen üilerdı sändep» älek.
Bır Qazaqstandaǧy ekı türlı älem. Ekı türlı ömır. Däl qazır şyrşa bezendırıp, toilaityn uaqyt pa? Biudjettıŋ büiırın bolmaşy, tükke keregı joq dünieler üşın tesıp, aqşany jelge şaşudyŋ aqyry jaqsylyqqa soqpasy sözsız. Şyrşa men oiynşyqqa jūmsaǧan aqşany aş otyrǧan aǧaiynǧa taratyp berse, sol maŋyzdy emes pe edı? Jaŋa jyldy asyǧa kütken kökeler, sızder basyp jürgen qazaqtyŋ jerınde qanşama adam joqşylyqtan qinalyp jür. Qanşama bala baqytsyz balalyq şaqtyŋ künderın ötkızude. Jasandy şyrşaǧa jūmsalatyn aqşa sol balaqailardyŋ köz jasyna ainalmasyna kepıldık bar ma?
Meruert HUSAİNOVA,
«Adyrna» ūlttyq portaly.
Ūqsas jaŋalyqtar
