«Koronavırýstyń ekinshi tolqyny kele jatyr» dep elimizdiń Densaýlyq mınıstri sońǵy kúnderi aqparat betterinen túspeı tur. Al Qazaqstandaǵy keıbir sheneýnikter jańa jyldyq daıyndyqqa kirisip ketipti. Pandemııa dep jantalasqan ýaqytta shyrsha bezendirip, jańa jyldy otshashýmen qarsy alý... Qısynǵa kele me? Qazaqstanda bári de múmkin.
Koronavırýsqa jurt kúmán keltirse, bıliktegiler jatyp kelip «renjıdi». Al endi sheneýnikterdiń shyrsha izdep, jańa jylǵa daıyndalǵanyna qarasań, «koronavırýs saıası oıyn» degen jel sóz ras pa dep te qalasyz. Nege deseńiz, Memlekettik satyp alý portalynda sońǵy ýaqytta jańa jyldy qarsy alý sharalaryna baılanysty tapsyrystar az túspepti. Bul týraly kznews.kz aqparattyq saıty Eýrazııa arnasyna silteme jasap habarlady.
Indettiń ekinshi tolqyny kele jatyr degen oı ótirikshi sekildi kórinedi mynaý tapsyrystarǵa qarasańyz. Sebebi, mınıstr aıtqandaı, ekinshi alapat aýrý tolqyny kele jatsa, sheneýnikterimiz nesine jetisip, shyrsha izdep jatyr?
Mysaly Qaraǵandydaǵy №23-mektep mundaı ázirlikti maýsym-shilde aılarynda bastaǵan. Al bul ýaqytta bizdiń el ólim-jitimnen endi-endi es jıyp jatqan edi. Memlekettik satyp alý saıtyndaǵy shyrshaǵa berilgen tapsyrys bul sózimizge aıǵaq bola alady. Biraq mektep dırektory bul týrasynda búı deıdi.
«Shyrshany satyp alý jańa jylǵa daıyndyq bastady degen sóz emes, ol bolashaqqa josparlanǵan jumys. Ekinshiden, shyrshany memlekettik satyp alýdyń baǵa usynýy boıynsha ótkizildi. Alǵashqy berilgen baǵa 714 myń teńge. Konkýrsqa 5 jabdyqtaýshy qatysty. Sonyń ishinde eń tómengi baǵa bergen 446 555 teńge», – dedi №23 mekteptiń dırektory Nurken Ashyqbaev.
Balqash qalasynyń ákimdigine qarasty Turǵyn-úı kommýnaldyq sharýashylyǵy jónindegi bólim de qysqa daıyndyqty áldeqashan bastap ketken. Qalany estetıkalyq bezendirýge baqandaı 13 mıllıon teńgesin shytyrlatyp sanap berýge daıyn.
Taldyqorǵan qalasynyń ákimdigi de shahar ortalyǵyn odan saıyn ásemdeý úshin 10 mıllıon teńge bólgeli otyr. Sondaı-aq qar túspeı jatyp, qysqa qamdanǵandardyń biri – Nur-Sultan qalasynyń Baıqońyr aýdany. Ǵımarattardy bezendirýge bólingen 17 mıllıon somany ákimdiktegiler bylaısha aqtaýǵa tyrysty.
«Seıfýllınniń boıynda burynǵy bazar bolǵan jerde 5 úı salyndy ǵoı. Áleýmettik jaǵdaıy tómen otbasylarǵa berildi. Eshqandaı jańa jyldyń daıyndyǵy emes. Jańa jylǵa túk qatysy joq. Byltyr bólingen aqsha. Úı salynyp jatqanda sondaı bezendirýge qosymsha aqsha bólinedi. Qyzyl jasyl ártúrli svetteri bar. Ondaı kórip júrsizder ǵoı, qalada búkil jerde bar», – dedi Baıqońyr aýdany ákiminiń orynbasary Erlan Jaýlybaev.
Jurt janyn shúberekke túıip, mynaý indetten qalaı aman shyǵýdy ýaıymdap otyrǵanda, úılerdiń syrtyn bezendirip, shyrsha alyp, «bolashaqqa daıyndalǵan» atqaminerlerdiń bul áreketine eriksiz «Bárekeldi!» degennen basqa ne aıtýǵa bolady? Bylaıǵy jurt karantınnen jumyssyz qalyp, úkimettiń ıtke súıek tastaǵandaı etip bergen 42500 teńgesine telmirip otyr. Al qolynda bılik tizgini bar ózgeleri shyrsha men oıynshyqtar alyp, «svettermen úılerdi sándep» álek.
Bir Qazaqstandaǵy eki túrli álem. Eki túrli ómir. Dál qazir shyrsha bezendirip, toılaıtyn ýaqyt pa? Bıýdjettiń búıirin bolmashy, túkke keregi joq dúnıeler úshin tesip, aqshany jelge shashýdyń aqyry jaqsylyqqa soqpasy sózsiz. Shyrsha men oıynshyqqa jumsaǵan aqshany ash otyrǵan aǵaıynǵa taratyp berse, sol mańyzdy emes pe edi? Jańa jyldy asyǵa kútken kókeler, sizder basyp júrgen qazaqtyń jerinde qanshama adam joqshylyqtan qınalyp júr. Qanshama bala baqytsyz balalyq shaqtyń kúnderin ótkizýde. Jasandy shyrshaǵa jumsalatyn aqsha sol balaqaılardyń kóz jasyna aınalmasyna kepildik bar ma?
Merýert HÝSAINOVA,
«Adyrna» ulttyq portaly.
