Seısenbide habarlanǵandaı, Qazaqstanda mektep oqýshylary mýzeılerge tegin kire alady. Al 2020 jyly oqýshylardyń mýzeıge aqyly emes, tegin kirýi úshin etnograf-ǵalym Táttigúl Qartaeva másele kótergen bolatyn. Atalǵan másele oń nátıjege sheshilip, mektep shákirtteri birqatar murajaılarǵa tegin kire alatyn boldy, dep habarlaıdy “Adyrna” ulttyq portaly.
Bul týraly etnograf-ǵalym óz Facebook paraqshasynda habarlady.
“9 ııýn 2020 jyly FB paraqshamda: "Qazaqstanda mektep oqýshylary úshin barlyq mýzeıge kirý tegin bolýy kerek dep sanaımyn! Óskeleń urpaq mýzeılerde saqtalyp turǵan óz ata-babalarynyń asyl murasyn, tarıhı joldaryn, elimizdiń tarıhı-mádenı qundylyqtaryn nege qarajat tólep kórýi qajet", - dep jazǵan edim. Alaıda Mádenıet mınıstrligi tek jazǵy kanıkýl aılarynda ǵana oqýshylarǵa mýzeıge kirýge tegin múmkindik berdi. Oqý jylynda aqsha tólep kirgen bala, tegin eken dep kúnde kanıkýlda mýzeıge kelmeıdi. Oqýshylardyń mýzeıge kirýin tegin etý kerek degen máseleni kótergenimizde osy saladaǵy quzyrly oryndardyń qarsylyǵyn da kórgen ek. "Almaty mýzeıler birlestigine" qaraıtyn 9 mýzeıge jyl boıyna mektep oqýshylaryna kirý tegin bolatyndyǵy jóninde sheshim qabyldandy”, - dep jazdy ol óz jazbasynda.
Sondaı-aq ol keleshek urpaqty patrıot etip tárbıeleý úshin mýzeılerge aqy qoımaı, oqýshylardyń murajaı eskertkishterin tegin kórýine jaǵdaı jasalýy kerektigin ashyp túsindirdi.
“Almatynyń osy aqjoltaı sheshimin Mádenıet mınıstrligi esh namystanbaı qabyl alyp, Qazaqstannyń barlyq mýzeılerine oqýshylardyń kirýin tegin etý kerek! Memleket qarjysyn oqýshylar esebinen toltyrýdy toqtataıyq. Ulttyq brendterimiz mýzeıde! Patrıot urpaq tárbıeleımiz deımiz, memleket qarajatyna jasalǵan mýzeıdi oqýshyǵa aqyǵa kórsetýimiz aqylǵa syıa ma?
P.S. Almaty ákimdigi endi "Kúntizbe eskertkishterdi" túzese, ashyq aspan asty mýzeı-eskertkishterine qatysty oń sheshim jasar edi”, – dep tolyqtyrdy Táttigúl Qartaeva.
“Adyrna” ulttyq portaly
