3-29 säuır aralyǧynda Litvanyŋ Vilnius qalasynda alǧaş ret European Mathematical Olympiad öttı. Qazaqstan ūlttyq qūramasy joǧary nätije körsetıp, komandalyq esepte 1-oryndy jeŋıp aldy. Būl turaly Oqu-aǧartu ministrlıgı jazdy, dep habarlaidy «Adyrna» tılşısı.
Qūrama qorjynyna 3 altyn jäne 2 kümıs medal tüstı. Qazaqstan qūramasynyŋ būl jarqyn jeŋısı halyqaralyq bılım arenasynda eldıŋ ziiatkerlık äleuetınıŋ joǧary deŋgeiın taǧy bır märte däleldedı.
Astana qalasyndaǧy Spectrum International School-dyŋ 12-synyp oquşysy Marǧūlan Şarel olimpiadanyŋ absoliut jeŋımpazy atandy.
Almaty qalasyndaǧy Nazarbaev Ziiatkerlık mektebınıŋ 11-synyp oquşysy Eldar Usenov, Almaty qalasyndaǧy Haileybury mektebınıŋ 11-synyp oquşysy Erik Lim altyn medal ielendı. Al kümıs medaldı Almaty qalasyndaǧy Nurorda mektebınıŋ oquşylary Erasyl Altynbek pen Änuar Aǧybaev aldy.
Qūrama jetekşılerı:
Iаroslav Galberg, Qazaqstan-Britan tehnikalyq universitetınıŋ 4-kurs studentı;
Ashat Abdykulov, Almaty qalasyndaǧy №165 mamandandyrylǧan liseiınıŋ matematika pänı mūǧalımı.
Aita keteiık, atalǧan olimpiadaǧa 19 elden 21 komanda, jalpy sany 126 oquşy qatysty. Qatysuşy memleketter qatarynda Albaniia, Armeniia, Bolgariia, Estoniia, Finliandiia, Fransiia, Gruziia, İslandiia, İrlandiia, Qazaqstan, Kosovo, Latviia, Litva, Soltüstık Makedoniia, Norvegiia, Polşa, Sloveniia, Şveisariia jäne Ukraina bar.
