Túrkistan oblysy Keles aýdanyndaǵy eski mektepte oqý bólmeleri jetispeıdi.Mektep basshysy bos jerdiń bárine parta qoıyp, balalardy úsh aýysymmen oqytýǵa májbúr dep habarlaıdy “Adyrna” ulttyq portaly KTK telearnasyna silteme jasap.
35 jyldan beri jóndeý kórmegen bilim oshaǵynyń tóbesinen de sý sorǵalap tur. Sonyń saldarynan ǵımarat syz tartyp, qabyrǵalary kógerip ketken. Apatty jaǵdaıdaǵy mekteptiń búgingi keıpi adam shoshyrlyq. Qaýynshy aýylynda jalǵyz mektep bar. Onyń óziniń tóbesi tesik. Jaýyn-shashynda synyptardy sý basady. Oqýshylar jaýyn tımeıtin jerlerge jaıǵasyp oqýǵa májbúr. Partalardyń jan-jaǵyna qoıylǵan sý jınaıtyn ydystar úırenshikti kóriniske aınalǵan.
«Sý tamshylaǵan soń shelek qoıyp qoıamyz. Tóbeni kórip otyrsyzdar, apattyq jaǵdaı. Terezeniń sylaǵy túsip jatyr. Oqýshylardyń basyna túse me dep qorqamyz. Sabaq oqýǵa da kedergi jasaıdy. Kógerip ketken, syz ıisi bar. Oqýshylar tynys alýǵa qınalady», – deıdi muǵalim Aıtbek Dúısen.
Únemi ylǵalda turatyn ǵımarattyń qabyrǵasy kógerip, mektepti sasyq ıis basqan. Parta men taqtalary da Keńes úkimetinen qalǵan. 1986 jyly salynǵan bilim ordasy sodan beri jóndeý kórmepti. Ábden tozyǵy jetken ǵımaratty muǵalimder jyl saıyn óz kúshimen jamap álek.
Mekteptiń sport zalyn aýdandyq sheneýnikter osydan 10 jyl buryn apatty dep tanyǵan eken. Sol ýaqyttan beri múldem jóndeý kórmegen. Ýaqyt ótken saıyn sport bólmesi kúırep, qaqyrap barady. Al jaýyn-shashynda oqýshylar dene shynyqtyrý páninde qolshatyr ustaýǵa májbúr. 300 oryndyq mektepte 700 bala bilim alady. Synyp kabınetteri jetispeıdi. Ár bos burysh oqý kabınetine aınalǵan. Tipti qoıma men ájethanaǵa deıin parta qoıylyp, oqýshylar úsh aýysymmen oqyp jatyr. Al mekteptiń jaı-kúıine kúıingen ata-analar ul-qyzyn oqýǵa jiberýge qorqady.
«Búkil aýyl turǵyndary másele sheshilmese, balalardy mektepke jibere almaımyz dep otyr. Óıtkeni qaýip bar. Qulap ketýine de eshkim kepil bermeıdi, toq soqpaýyna da eshkim kepil bermeıdi. Bizge ár balanyń densaýlyǵy, amandyǵy kerek», – deıdi Qaýynshy aýylynyń turǵyny Seıilhan Amanberdıev.
Mektep basshylyǵy ǵımaratqa kúrdeli jóndeý qajet ekenin sheneýnikterge 10 jyldan beri aıtyp kelemiz deıdi. Al aýdandaǵy bilim bólimi bar másele qarjyǵa tireletinin aıtady.
«Smetasy kórsetilgen qujatty osy jerdegi kásipker demeý kórsetip, bir aıdyń ishinde bitirip berem degen. Keshe sóılestik. Túgel, qabyrǵasy, ishi-syrty, edeni, shatyryn bárin jóndeýge 11 mıllıon teńge kerek», – deıdi Keles aýdany adamı áleýetti damytý bóliminiń basshysy Baqtııar Ábdıev.
Endi bir aıda qujaty jasalsa, bıyldan qaldyrmaı bıýdjetten kúrdeli jóndeýge qarjy suratamyz deıdi. Biraq aqshanyń dereý bóliner-bólinbesi taǵy belgisiz.
“Adyrna” ulttyq portaly
