Shyǵys Qazaqstan oblysy, Altaı aýdanynyń Jańa Buqtyrma aýylyndaǵy Uly Otan soǵysyndaǵy Jeńistiń 75 jyldyǵyna arnalǵan monýment aýmaǵyn abattandyrý jumysyna 240 189 133 teńge qarjy bóldi, - dep habarlaıdy Adyrna ulttyq portaly goszakup.gov.kz saıtyna silteme jasap.
Jańa Buqtyrma — Shyǵys Qazaqstan oblysynyń Altaı aýdanyna qarasty kent. Kent degen aty bolmasa, turǵylyqty halyq sany bes myńǵa jetpeıtin Ertis boıyndaǵy shaǵyn aýyl.
Sol aýylǵa osydan úsh jyl buryn Ekinshi dúnıejúzilik soǵystyń 75 jyldyǵyna arnalyp monýment calynǵan. Sol monýmenttiń aýmaǵyn abattandyrý úshin 26 qazan kúni eki tender jarııalanǵan.
Birinshisi "Novaıa Buqtyrma aýylyndaǵy Uly Otan soǵysyndaǵy Jeńistiń 75 jyldyǵyna arnalǵan monýment aýmaǵyn abattandyrý" obekt boıynsha tehnıkalyq qadaǵalaý qyzmetterin kórsetý" dep atalady. "Shyǵys Qazaqstan oblysynyń memlekettik satyp alý basqarmasy" memlekettik mekemesi atalǵan jobaǵa 167 718 274.07 teńge bólgen.
Al, ekinshi tender dál sol kúni "Novaıa Buqtyrma aýylyndaǵy Uly Otan soǵysyndaǵy Jeńistiń 75 jyldyǵyna arnalǵan monýment aýmaǵyn abattandyrý" jobasyn basqarý boıynsha ınjınırıngtik qyzmetter" degen ataýmen jaryq kórdi. Bul jumysqa bıýdjetten 72 470 859.17 teńge bólingen. Iaǵnı, eki ataýmen jarııalanǵan bir jumysqa jalpy somasy 240 189 133 teńge jumsalady degen sóz.
Atalǵan eki memlekettik satyp alýdyń jeńimpazy 10 qarasha kúni anyqtalady.
Jańa Buqtyrma aýyly Úlbi jotasynyń eteginde, Ertis ózeniniń jaǵasynda ornalasqan, tabıǵaty keremet meken. Jergilikti bılik eldimeken parkin kórkeıtýge 240 mıllıon teńgeden astam qarjy bólip, resmı kent sanalatyn aýyldy týrıstik ortalyqqa aınaldyrýdy kózdep otyrǵan shyǵar.
Olaı bolsa, ne sebepti Uly Otan soǵysyndaǵy Jeńistiń 75 jyldyǵyna arnalǵan monýment aýmaǵyn abattandyrýǵa basymdyq beriledi?
Shyǵys Qazaqstan oblysynyń shendileri dál Reseı bıligi sekildi memlekettiń bar ıdeologııasyn Ekinshi dúnıejúzilik soǵystaǵy jeńiske baılap, halyqty rýhtandyrmaq pa?
Bizdi osy suraq mazalaıdy. Siz ne deısiz?
Qanat BIRLIKULY,
“Adyrna” ulttyq portaly
