Áleýmettik jelide qoǵam belsendisi Jomart Atabaı “depýtattyq pen mandatqa” qatysty jazba jarııalady. Avtor depýtattyq saýaldyń suıylyp bara jatqanyna toqtalyp, óziniń ótkir pikirin jalpaq jurtqa jarııa etti, dep “Adyrna” ulttyq portaly.
San qıly depýtattyq saýaldy taldaǵan belsendi qoǵamnyń shyn janashyr atqaminerlerge muqtaj ekendigin aıtyp, aqylǵa syımaıtyn saýaldardy qoıǵandardy synǵa alady.
- Parlament saılaýy jaqyndaǵasyn bizdiń maýbas-uıqybas, sopaqbas depýtattarymyz oıanyp, sóıleı bastady, aǵaıyn! Bireýi shyqty Kenesarynyń basyn qozǵap. Ekinshisi áıelderdiń zeınet jasyn qysqartý kerek dep saırap jatyr. Erteń úshinshisi shyǵatyn shyǵar "qarbyz emes darbyz" dep. Sol baıaǵy bolmaıtyn qysyr áńgimeler. Túk bitirmeıtin depýtattardy (Gennadıı Shıpovskıh pen Qazybek Isa olardyń qatarynda joq) saılaǵan ózimiz kinálimiz. Aldaǵy saılaýda deni durys depýtattar saılaıyqshy, - dep jazdy avtor.
Eske sala keteıik, jaqynda depýtat Baqytbek Smaǵul Reseıden Kenesary hannyń basyn aldyrtý máselesin minberde kótergen edi. Depýtattardyń mundaı belsendiligin halyqtyń basym bóligi jaqynda ótetin Parlament saılaýyna qatysy bar dep sanap otyr.
“Adyrna” ulttyq portaly
