Sońǵy úsh jylda 237 áskerı qyzmetshi qaza bolyp, onyń 50-i sýııd jasaǵan - Senator

3300
Adyrna.kz Telegram

Senator Dana Nurjigit elimizdiń Premer-Mınıstrine joldaǵan depýtattyq saýalynda Úkimetti áskerı qyzmetshilerdiń ómiri men densaýlyǵyn saqtaý jónindegi jumysty kúsheıtýge shaqyrdy. Bul týraly Azattyq Ruhy agenttigi habarlady, dep jazady "Adyrna" ulttyq portaly.

Depýtattyń aıtýynsha, sońǵy úsh jylda 237 áskerı qyzmetshi qaza boldy. 2020 jyly -77, 2021 jyly -96, 2022 jyly 64 adam kóz jumǵan. Onyń 89-y aýrýdan, 62-si jol apatynan, 50-i sýııd saldarynan qaıtys boldy.

Senator jaǵdaıdy jaqsartý úshin áskerge shaqyrylýshylardyń ǵana emes, jasóspirimderdiń de psıhologııalyq jaǵdaıyn baqylaý mańyzdy ekenin atap ótti.

«Biz 13-14 jastaǵy er balalardyń densaýlyǵy, tán saýlyǵy, psıhıkasy, psıhologııasy únemi baqylaýda bolýy kerek dep esepteımiz. Áskerge shaqyrý komıssııasynyń aldyna kelgenshe ol balanyń búkil psıho-fızıkalyq portreti, barlyq aqparat arnaıy elektrondy kitapshada  jınalyp turǵany durys. Qazirge kezde mindettelgen kvotany toltyrý úshin ásker qataryna densaýlyǵy joq bozbalalar da ketip jatyr», - dedi Dana Nurjigit.

Senator áskerı qyzmetshilerdiń qoǵamdaǵy mártebesin kóterýdiń mańyzdylyǵy jáne olardyń ál-aýqatyn jaqsartý týraly da aıtty.

Onyń aıtýynsha, munda óz sheshimin talap etetin kóptegen másele qordalanyp qalǵan.

«Qarýly kúshter qataryndaǵy kelisim-shart boıynsha qyzmetke kelgen birinshi jyldaǵy soldattyń jalaqysy 82 myń teńge. Qazaqstan dárigerleriniń jalaqysy kóterilgende, elimizdiń áskerı dárigerleri bul úlesten qalys qalyp, búginde olardyń jalaqysy 200 myń teńgeni quraıdy. 2021 jyldan beri «Áskerı baspana» baǵdarlamasy aıasynda «Otbasy bank» alǵashqy jarnany 5%-dan  20%-ǵa deıin ósirgen. Al áskerı jalaqy 100 myńǵa da jetpeıtin jas áskerı maman baspananyń alǵashqy 20 paıyzyn qalaı tólemek? Osydan keıin baryp, áskerı adamnyń qoǵamdaǵy mártebesi týraly qandaı sóz qozǵaýǵa bolady?!», - dedi depýtat. 

Dana Nurjigit áskerge shaqyrylatyn jáne áskerge shaqyrylǵandardyń densaýlyǵyn saqtaý jáne qadaǵalaý, olardyń densaýlyǵynyń elektrondyq tirkelimin jasaý jáne áskerı qyzmetshilerdiń ál-aýqatyn jaqsartýǵa baılanysty vedomstvoaralyq yntymaqtastyqty nyǵaıtýdy kózdeıtin birqatar usynystar aıtty.

"Adyrna" ulttyq portaly 

Pikirler