Atyraý oblysynda jumysshylar ereýilge shyqty, dep habarlaıdy "Adyrna" tilshisi Ulysmedia.kz-ke siltep.
Maqat aýdanynda Qashaǵan ken ornynda qurylysshylar ereýilge shyǵyp, jalaqyny kóterýdi talap etken.
BBJ Group kompanııasynyń ereýilge shyqqan 50-ge jýyq jumysshysyna dırektordyń orynbasary jaýap berdi. Ol qyzmetkerleriniń talabyn oryndaýdan bas tartyp, jumysty toqtatyp tastaǵan.
«Ereýildi toqtatý, túsindirý jumystaryn júrgizý jáne jaǵdaıdy beıbit jolmen sheshý úshin oqıǵa ornyna aýdan ákimdiginiń, aýdandyq prokýratýra qyzmetkerleri jáne «Qazaq qurylys toby» jobalyq basqarý tobynyń jetekshisi keldi. Kelissózder barysynda taraptar Maqat aýdanynyń ákimdigi BBJ GROUP kompanııasynyń basshylyǵy men qyzmetkerleri úshin kelissózder uıymdastyratyny týraly ózara sheshimge keldi», - dep habarlady Maqat aýdanynyń ákimdigi.
Atalmysh gaz óńdeý zaýyty Atyraý qalasynan 60 shaqyrym jerde «Bolashaq» keshendi munaı óńdeý zaýytynyń janynan salynýda.
