Sońǵy aılary top aldynan kórinbeı ketken eks-prezıdent Nursultan Nazarbaevtyń tuńǵysh prezıdent kúni qarsańynda belsendiligi arta tústi. Elde qazirgideı ózine yńǵaıly júıeni mura etip qaldyrǵan saıası zeınetker úshin onyń top aldynan kórinýi jáne ne aıtqany mańyzdy. Is basyndaǵy depýtattar saıası zeınetker belsendiligin qalaı baǵaılaıdy, surap kórdik.
NAZARBAEV MÁSKEÝDE ME, KREMLDE ME?
Qazaqstannyń eks-prezıdenti el Táýelsizdigi kúni, ıaǵnı 16 jeltoqsanda Máskeýge barǵany aıtyldy. Áýelde qazaqstandyq telegramm-arnada tolyq rastalmaǵan aqparat tarady. Artynsha reseılik telegramm-arnada da Nazarbaevtyń Máskeýde qaıta toqtaǵany habarlandy. Málimetterge qaraǵanda, Qazaqstannyń eks-prezıdenti Reseıdiń qazirgi prezıdentimen kezdesýge qatty yntaly bolǵan.
Tuńǵysh prezıdenti kúni satylymǵa túsken «Meniń ómirim. Bodandyqtan bostandyqqa» estelik kitabynda Nazarbaev bútin bir taraýdy Pýtınge jáne onyń Reseı men Qazaqstan arasyndaǵy qarym-qatynastardy damytýdaǵy róline arnaýǵa tyrysqan. Bul memýardy kóp uzamaı Nazarbaevtyń baspasóz hatshysy Aıdos Úkibaı arnaıy Máskeýge baryp, Reseı prezıdentiniń baspasóz hatshysy Dmıtrıı Peskovqa tabys etken. Nazarbaevtyń Máskeýge barǵany jaıyndaǵy sońǵy málimetterde de osy kitap týraly aıtylady. Ázirge Nazarbaevty Kreml qabyldaǵan-qabyldamaǵany belgisiz.
«JELTOQSTANDA JARIIaLANǴAN ESTELIK»
Munyń aldynda ol «Astana Club» pikirtalas alańyn jınap, onda álemdik saıasat týraly prezıdent kezindegi rıtorıkasyn taǵy da qaıtalaǵan. Osy klýbyń uıymdastyrýshysy Senattyń burynǵy basshysy Darıǵa Nazarbaeva da osy jıynda boı kórsetti.
Nazarbaev otyrysta el bolashaǵy men óskeleń urpaqtyń keleshegine alańdaıtynyn jetkizip, ıadrolyq qarýdy taratpaý jáne qarýsyzdaný máselesine ıadrolyq qarýǵa qarsy qozǵalystyń barlyq qatysýshylaryn belsene atsalysýǵa shaqyrdy.
– Ózderińiz bilesizder, men 2019 jyly naýryz aıynda óz erkimmen Qazaqstan Prezıdenttiginen kettim, qazir eshqandaı laýazym atqarmaımyn. Alaıda, sanaly ǵumyryn eline qyzmet etýge arnaǵan, qashanda mańyzdy oqıǵalardyń ortasynda júrgen adam retinde ózimiz, balalarymyz ben nemerelerimiz ómir súretin álemniń jaı-kúıine, bolashaǵyna árkez alańdaımyn. Jahandyq qaqtyǵystyń aldyn alý úshin álemdik saıasatta dıalog qurýdan basqa jol joq ekenine senimdimin, – dedi N.Nazarbaev.
Óz sózinde eks-prezıdent álemdik daǵdarystar men sonyń aıqyn kórinisi retinde birneshe tarıhı oqıǵalardy tilge tıek etti. Sondaı-aq jaqynda tusaýy kesilgen kitabynyń aǵylshyn tiline aýdarýǵa usynys túsip jatqanyn da atap ótti.
– Jalpy, keıingi ondaǵan jyl ishinde Qazaqstan kóptegen daǵdarystyń sátti sheshilýine dáneker boldy. Onyń bárin bir kezdesý aıasynda qamtý múmkin emes. Sońǵy 30 jylda syrtqy saıasatta bolǵan eń aýqymdy oqıǵalar týraly tolyǵyraq meniń jeltoqsan aıynyń basynda jarııalanǵan estelikterimde jan-jaqty aıtyldy. Bul eńbek úlken qyzyǵýshylyq týdyrdy, sheteldik baspalardan da ony aǵylshyn tiline aýdarýǵa usynystar túsip jatyr. Kitap jaqyn arada jahandyq aýdıtorııaǵa jetedi dep oılaımyn, - degen burynǵy prezıdent.
BURYNǴY ELBASY JÁNE EKI QYZY
Qazaqstan Táýelsizdigi kúni qarsańynda «Astana klýbynan» keıin top aldyna eks-prezıdenttiń ekinshi qyzy Dınara Qulybaeva shyǵypǵ «NNEF» qoǵamdyq qorynyń jumysy jaıynda aıtty. Dınara Nursultanqyzy jetekshilik etip otyrǵan qordyń jumysy týraly belgili blogerler áleýmettik jelide maqtap post jazdy. Eks-prezıdent pen onyń eki qyzynyń top aldyna irkes-tirkes shyǵýy qoǵamdy oılantyp tastady.
Eks-prezıdent pen onyń qyzynyń halyq aldyna uzaq úzilisten keıin qaıta shyǵýy, ǵalamdyq saıasat týraly aıtýy neni bildiredi?
ERLAN DEPÝTATTYŃ EKIUShTY JAÝABY
Májilis depýtaty Erlan Saıyrov Nursultan Nazarbaevqa qatysty suraqqa jaýap berýge asa qulyqty bolmady. «Naqty is-shara jóninde meniń eshqandaı aqparatym joq» degen depýtatqa «Sizder «Eski Qazaqstannyń» revanshıstik kúshteri týraly jıi aıtasyzdar. Solar qazir kúsh alyp kele jatqan joq pa?» dep suraq qoıdyq.
Bul suraqqa depýtat «Ony biz burynnan beri aıtyp júrmiz ǵoı. Belgili bir kapıtal bolatyn bolsa, ol kapıtal bos jatpaıdy. Ol árqashan ózine jumys izdeıdi. Sondyqtan da keıbir toptardyń saıasatqa qaıtyp kelýge tyrysýynyń kórinisi bolýy múmkin» dep qysqa qaıyrdy.
AZAT DEPÝTAT EKS-ELBASY TÝRALY EShTEŃE «ESTIMEGEN»
«Aq jol» partııasynyń tóraǵasy ári Májilis depýtatty Azat Perýashev eks-prezıdenttiń «Astana klýbynyń» jıynyna qatysqanyn estimegenin aıtty.
– Jalpy damyǵan memleketter burynǵy prezıdentter qoǵamnyń nazarynan shyqpaıdy. Olar túrli qoǵamdyq jumystar júrgizip, keıde lekııa oqıdy, keıde kópshilikpen kezdesip óziniń tájirıbesin bólisetin jaǵdaı bar. Ony siz aıtqandaı revanshızmge daıyndalý dep aıta almaımyn. Siz aıtqan klýbtyń áńgimeleri qandaı ekenin kórip, oqyǵan joqpyn. Negizinde burynǵy memleket nemese úkimet basshylary qoǵamdyq tulǵalarǵa aınalǵannan keıin belsendi bolýy halyqtyń kóńilinen shyqsa, bul durys. Bul jerde halyq bul belsendilikti qalaı qabyldap otyr degen másele bar. Eger klýb ústinde revanshızm sııaqty naqty áńgimeler bar bolsa, ol bólek áńgime. Iaǵnı,bizdiń Kostıtýııamsyzǵa saı bılikke tek qana zańdy jolmen kelýi múmkin. Eger ondaı áńgime joq bolsa, onda bilmedim», - dedi ol.
BAZARBEK DEPÝTAT NAZARBAEV DÁÝRENI ÓTKENINE SENIMDI
Bul suraqty Májilis depýtaty Baqytjan Bazarbekke de qoıyldy. Almaty qalasynan majorıtarlyq saılaý júıesi boıynsha depýtat bolǵan azamat Nazarbaev taqyrybyna qyzyqpaıtynyn, tipti kitabyn da oqymaǵanyn eskertti. Depýtattyń osy pikirine baılanysty «Eger eks-prezıdenttiń jaqtaýshylary bılikke qaıta kelse, sizdiń depýtat bolýyńyz múmkin be?» dep suraq qoıdyq.
– Oı, ol kelýi múmkin emes. Sebebi sol kisiniń basqarý kezeńindegi bylyqtyń bárin tazalap jatyrmyz. Ol kisiniń bılikke qaıta kelýi barlyq jumysymyzdy qurdymǵa ketiredi. Ondaı bolmaıdy. Nazarbaevtyń zamany ótti. Jańa zamanǵa aıaq bastyq. Ol kisiniń bılikke kelýi ekitalaı. Birinshiden, qanshama halyqtyń muńy, energetıka, aýyl sharýashylyǵy, jer, sý, bilim, densaýlyq saqtaý jáne halyqaralyq saladaǵy qordalanǵan problemanyń bári sol kisiniń kezinde oryn aldy. Árıne, jetistikter boldy. Biraq problemalar kóp boldy. Eń bastysy sybaılasjemqorlyq beleń alyp ketti, - dedi depýtat.
Serik Joldasbaı
«Adyrna» ulttyq portaly
