2009 jyly sanaqtan keıin 746 mıllıon teńge kóleminde aqsha jymqyrdy degen aıyppen 5 jyl jazasyn ótep shyqqan statıstıka agenttiginiń burynǵy tóraǵasy Anar Meshimbaeva Nege.kz saıtyna suhbat berdi. 3 jyl kóleminde izdeýde bolǵan eks-shendi atalmysh áńgimede Nazarbaevqa qatysty buryn aıtylmaǵan aqparattardy aqtardy, dep habarlaıdy "Adyrna" portaly.
2009 jyly Anar Meshimbaeva men onyń eki orynbasaryna qatysty atyshýly qylmystyq is qozǵalǵan bolatyn. Artynsha sheneýnik Túrkııa asyp, keıin Máskeýge ketkeni el aýzynda júrdi. Tipti ol 3 jyl kóleminde izdeýde boldy. Burynǵy tóraǵanyń aıtýynsha, mundaı sheshimge ol Nazarbaevtyń buıryǵymen barǵan.
"Elden ketpeımin, eger qashsam, shynymen "aqshany urlady" dep aıtady" dedim. Biraq prezıdent "Eshteńeden qoryqpa. Ári ketse, bir jyl nemese bir jarym jyldan keıin qaıtaryp alamyz. Ol kezde bári tynyshtalady" dedi. Eń bastysy "seniń eki orynbasaryń da túrmege otyrmaıdy" degen ýáde bergen. Negizi sol ekeýin bosatsyn dep ketip qalǵan edim. Óz basym prezıdentke sendim ǵoı. "Sottalyp ketem-aý" degen tıtteı de kúmán bolmady. Al keıin "bálkim, ketpegende basqasha bolar ma edi" degen oı da keldi. Biraq naqty bilmedim. Múmkin, elden ketpesem, báribir sottap jiberetin be edi. Biz bári ádiletti, shynaıy bolady dep kúttik. Alaıda olarǵa bul oıyn sııaqty. Bireý bylaı aıtsa, oǵan senedi, ekinshi bireý basqasha pikir bildirse, "túrmege otyrǵyzaıyq, sabaq bolsyn" deıdi. Olar adamnyń ómirin emes, saıasatty oılaıdy. Bul jerde bizge qarsy jumys istegen Qarjy polıııasynyń basshysy Qaırat Qojamjarov qana emes, arnaıy top boldy ǵoı", - dep áńgimeledi sotty bolǵan burynǵy sheneýnik.
