Burynǵy ulttyq ekonomıka mınıstri Qýandyq Bıshimbaevtyń qolynan qaza tapqan Saltanat Núkenovany jerleý rásimi ótti. Marqummen qoshtasýǵa kelgen dostary Núkenova men eks-mınıstrdiń ara-qatynasy týraly aıtty, dep habarlaıdy "Adyrna" tilshisi Ulysmedia.kz-ke silteme jasap.
Marqum Saltanat Núkenovany qala irgesindegi Atameken aýylyna jerledi. Jerleý rásimine belgili saıasatkerler men qoǵam qaıratkerleri, Saltanattyń týǵan-týystary, dostary men qurbylary qatysty. Qazaǵa kóńil aıtyp kelgender polıeıler men sot qaıǵyly oqıǵanyń barlyq mán-jaıyn jan-jaqty tekserip, kinálini zań aıasynda qatań jazalaý kerektigin aıtty.
"Ol ony qatty urǵany sonshalyq, denesinde saý jerin qaldyrmady. Bizdiń qoǵamda jaýyz, qatygez adamdardyń qolynan qarapaıym adam qaıtys bolmaýy kerek,"-deıdi.
urynǵy sheneýnik pen marqum Saltanat Núkenovanyń otbasynda jıi janjal bolǵan. Qurbylarynyń aıtýynsha Bıshimbaev óz áıeline jıi qol kótergen.
"Ol oǵan jıi qol kóteretin. Ol (Saltanat Núkenova - red.) bizge shaǵymdandy, biraq basqalarǵa aıtpady. Biz kúıeýin tastap ketýdi talaı ret ótindik", – deıdi Saltanat Núkenovanyń jaqyn dosy Indıra.
Saltanatpen qoshtasýǵa Qazaqstannyń túkpir-túkpirinen jınalǵan qurbylary marqumnyń otbasylyq ómirde joly bolmaǵanyn aıtady. Astanadan kelgen Madına esimdi boıjetken qurbysy Bıshimbaevty tastap ketpek bolǵanyn esine aldy.
«Bizdiń kóz aldymyzda eshteńe bolǵan joq. Saltanattyń aıtýynsha, ol kúıeýinen ketip, páter jaldaǵan. Sodan keıin ol (Qýandyq Bıshimbaev - red.) qaıtadan jalynyp, tizerlep turyp, ony jaqsy kóretinin aıtyp, qaıtarǵan. Biz qurbymyzǵa mundaı adamdar ózgermeıdi dedik, biraq ol tyńdamady. Ol (Saltanat Núkenova - red.) ony jaqsy kóretinin aıtty. Birde qurbyma ony óltiretinin de aıttym. Óıtkeni bulaı uzaqqa sozylmaıtyn edi", - dedi Madına.
Marqum Saltanat Núkenovanyń dostary qaıǵyly jaǵdaıda adamgershilik tanytyp, qajetsiz pikirlerden aýlaq bolyp, bolmaǵan nárseni oılap tappaýdy ótindi. Dostarynyń aıtýynsha eks-mınıstr boıjetkenniń qyr-sońynan qalmaı, ony kezdesýge shaqyryp, kóńilin aýlaǵan.
"Ol ony Instagramda kórdi, syrttaı ǵashyq boldy, ony tapty, oǵan qol jetkizdi. Saltanat alǵashynda kezdeskisi kelmedi. Sebebi ol manıak sııaqty qurbymyzdyń artynan qalmaǵan. Onyń áreketteri bizge ony (Saltanat Núkenova - red.) qatty jaqsy kóretin sııaqty kórindi... Sodan keıin bári bastaldy. Saltanat balaly bolǵysy keldi, biraq bola almady. Ol "eger júkti bolsam, bári tynyshtalyp, ózgeretin shyǵar" dep oılady. Al biz oǵan kerisinshe, jaǵdaı budan da qıyn bolatynyn aıttyq», - dedi Saltanat Núkenovanyń dostary.
Marqumnyń dostary Bıshimbaev úshinshi áıeline eshkimmen sóılesýge ruqsat bermeı, onyń múmkindikterin shektep tastaǵanyn aıtady.
"Ol Saltanatqa eshkimmen sóılesýge ruqsat bermedi, tipti bizben ádettegideı kezdese almady. Ol onyń múmkindigin shektep, jumys istetkizbedi. Biraq ol (Saltanat Núkenova - red.) ózin-ózi qamtamasyz ete alatyn jáne ol áıgili astrolog boldy. Eger biz bir jerge barsaq, onyń kúıeýi bizben birge boldy. Ol ony (Saltanat Núkenova - red.) eshqashan jalǵyz qaldyrmaıtyn", - dep shyndyqpen bólisti Núkenovanyń qurbylary.
Dostary Saltanat Núkenovanyń myqty astrolog bolǵanyn aıtady. Ol kóptegen adamdarǵa keńesi arqyly kómek berip, sońynda ózi "órtendi" deıdi.
Saltanat Núkenovamen qoshtasý rásimi 10 qarasha kúni Mashhúr Júsip ortalyq meshitinde ótti. Ony sońǵy saparǵa shyǵaryp salýǵa júzdegen adam keldi. Oblys ortalyǵyna otbasy men dostarynan bólek, Jelezın aýdanyndaǵy jerlester, synyptastary, kýrstastary, jaqyn dostary jınaldy.
Marqumdy Pavlodar irgesindegi Atameken aýylyndaǵy zıratqa jerledi.
