Pavlodar oblysynyń Baıanaýyl aýdanynda dala órti sóndirilip jatyr. Bul týraly Tótenshe jaǵdaılar mınıstrligi málimdedi, dep habarlaıdy “Adyrna” ulttyq portaly.
4 sáýir kúni 112 pýltine Jasybaı orman sharýashylyǵy aýmaǵynda qurǵaq shóptiń janǵany týraly aqparat túsken.
“Órtti sóndirýge dereý TJD, orman sharýashylyǵy, "Qazavıalesoohrana" jáne Jasybaı orman sharýashylyǵynyń kúshteri men tehnıkalary jumyldyryldy. Qazirgi ýaqytta órtti sóndirýge 70-ke jýyq adam jáne 20-dan astam tehnıka tartylǵan. Alaıda qatty jel men qurǵaq ósimdikterdiń kóptigi jalynnyń tez taralýyna sebep bolyp otyr”, – delingen habarlamada.
Oqıǵa ornyna Pavlodar oblysy TJD basshylyǵy men ákimdik ókilderi attandy. TJM jáne oblystyq TJD jedel shtaby quryldy.
“Qosymsha órt ornyna 38 TJD qyzmetkeri men 11 arnaıy tehnıka jiberildi. Jaǵdaı erekshe baqylaýda”, – dep habarlady tótenshe jaǵdaılar qyzmeti.
