Bügın Astanada Türkı memleketterı ūiymynyŋ basşylary bas qosady, dep habarlaidy «Adyrna» tılşısı «Habar 24»-ke sılteme jasap.
Biyl Türkı memleketterı ūiymy basşylarynyŋ mereitoilyq sammitın Qazaqstan ūiymdastyryp jatyr.
Auqymdy şaraǧa ūiymǧa müşe memleketter – Äzerbaijan, Qyrǧyzstan, Türkiia jäne Özbekstan basşylary qatysady. Sondai-aq sammit jūmysyna Majarstan men Türıkmenstan baqylauşy el retınde qatysady.
Būl qūrylym äu basta «Türkıtıldes memleketterdıŋ yntymaqtastyq keŋesı» dep atalǧan. Keiın «Türkı memleketterı ūiymy» bolyp özgerdı. 2021 jyly Ystambūlda ötken sammitte bauyrlas elder basşylary osylai dep özgertuge kelıstı. Qūrylymǧa müşe elder basşylarynyŋ alǧaşqy sammitı 2011 jyly Almatyda ötken. Al byltyr Samarqanda ötken sammitte kelesı jiynnyŋ Astanada ötetını belgılı boldy.
Türkı älemınıŋ atajūrty sanalǧan Qazaqstan ūiymǧa müşe barlyq elmen jan-jaqty qarym-qatynasty damytuǧa airyqşa män beredı.
«Qazırgı almaǧaiyp kezeŋde kölık-tranzit kommunikasiiasynyŋ äleuetın arttyru jäne onyŋ mümkındıgın barynşa paidalanu asa maŋyzdy. Sebebı bızdıŋ memleketterımız batys pen şyǧysty, soltüstık pen oŋtüstıktı tıkelei bailanystyrady. Qazaqstan, Äzerbaijan, Türkiia arqyly ötetın Transkaspii halyqaralyq kölık
dälızı – sonyŋ jarqyn mysaly. Sondai-aq būl ūiymnyŋ halyqaralyq arenada märtebesı ösıp keledı. Mūnda köterılgen bırqatar mäsele şeşımın tapty»,—dedı Prezident janyndaǧy QSZİ bas sarapşysy Bolat Äuelbaev.
Türkı yntymaqtastyǧyna ūiytqy bolǧan ūiymdardyŋ tarihyn zerdelesek, olardyŋ köpşılıgıne Qazaqstan bastamaşy bolǧan. Türıksoi, TürkPA jäne Türkı akademiiasy – sonyŋ aiqyn dälelı. Būl ūiymdar bauyrlas elderdıŋ mädeni-ruhani jaqyndasuyna ölşeusız üles qosyp otyr. Äsırese keiıngı jyldary ūiym aiasyndaǧy bailanystar nyǧaia tüsken. Qazaqstannyŋ Türkı memleketterı ūiymyna müşe eldermen özara tauar ainalymy da arta tüstı. Dälırek aitqanda, 2010–2022 jyldar aralyǧynda elımızdıŋ ūiymǧa müşe eldermen aradaǧy tauar ainalymy 3 ese östı. Söitıp, 4,5 mlrd dollarlyq kölemnen 12,9 mlrd dollarǧa jettı. Mäselen, jaqynda ǧana elımızdıŋ parlamentı Türkı investisiialyq qoryn qūru turaly kelısım ratifikasiialady. Būl degenımız türkı memleketterınıŋ ekonomikalyq damuyna maŋyzdy serpın berılmek.
Eske sala keteiık, nauryz aiynda Memleket basşysy Türkı memleketterı ūiymynyŋ mereitoilyq sammitı Türkıstanda ötetının aitqan edı.
