Mańǵystaý oblysynyń Ishki saıasat basqarmasy Ulttyq valıýtanyń 30 jyldyǵyna oraı Aqtaý jáne Jańaózen qalalaryndaǵy kóshelerge ornalastyrylatyn 5 bılbordqa 1 339 285 teńge bóldi, dep habarlaıdy «Adyrna» tilshisi goszakup.gov.kz saıtyna silteme jasap.
Atalǵan tender 17 qazan kúni jarııalanǵan. Memlekettik satyp alýdyń ataýy "Aqtaý jáne Jańaózen qalalarynyń kóshelerinde ornalasqan bılbordtar arqyly QR Ulttyq valıýtasynyń qurylý tarıhymen tanystyrý qyzmeti" dep atalady. Qazirshe, tenderdi utyp alý úshin bir ǵana kompanııa úmitker retinde qujattaryn tirkegen. Jeńimpaz 24 qazan kúni anyqtalady.
Tenderdi utyp alǵan kompanııa Aqtaý qalasynda 4 (tórt) birlik jáne Jańaózen qalasynda 1 (bir) birlik, barlyǵy 5 (bes) birlik bılbord ornatýǵa, banner eskızin daıyndaý, basyp shyǵarý, konstrýkııa jaldaý, ornalastyrý, sheship alý jáne t.b. qyzmetterdi atqarýǵa mindettelgen. Sondaı-aq, tehnıkalyq sıpattamada bılbordtyń syrtqy pishini – 3h6 kóleminde bolýy kerektigi jazylypty.
Endi, esepteńiz... 5 bılbordtyń jalpy ortaq quny 1 339 285 teńge. Demek, ár danasy 267 285 teńgege jasalady degen sóz.
Ulttyq valıýtanyń tarıhyn nasıhattaý úshin bıýdjetten 1 339 285 teńge qarjy bólinip daıyndalǵan sol 5 dana bılbord, bar bolǵany bir aı, ıaǵnı 1 jeltoqsanǵa deıin ǵana qala kóshelerinde ilinip turmaq eken.
Qosh! Endi bizdi myna suraqtar mazalaıdy...
1. Mańǵystaý oblysynyń Ishki saıasat basqarmasy QR Ulttyq valıýtasynyń 30-jyldyǵyn nelikten bir aı ǵana ilinip turatyn 5 qana bılbordpen atap ótpek?
2. Ulttyq valıýtanyń tarıhyn eki qalaǵa ornatylǵan bes-aq bılbordtpen halyqtyń sanasyna quıý múmkin be?
3. Mańǵystaý oblysynyń Ishki saıasat basqarmasy úshin tól teńgemizdiń 30 jyldyq merekesi hám tarıhy Aqtaý men Jańaózennen basqa aýdandarǵa qajet emes pe?
4. Pishini 3h6 bılbord shyǵarýdyń hám ilýdiń naryqtaǵy kóterme quny 50-60 myń teńgeden aspaıdy. Endeshe, nelikten ár bılbordqa 267 285 myń teńge jumsalyp otyr?
Bul suraqtarǵa atalǵan oblystyń Ishki saıasat basqarmasy kóp keshiktirmeı jaýap berip qalar dep oılaımyz. Biz árıne, Ulttyq valıýtamyz, tól teńgemizdiń 30 jyldyq mereıtoıynyń atalyp ótýine qarsy emespiz. 15 qarasha kúni bolatyn Valıýta kúnin baǵasy ýdaı 5 bılbordpen jaba salý kóńilge kúdik uıalatatqanyn jasyra almaımyz!
Qanat Birlikuly,
«Adyrna» ulttyq portaly
