Búgin Astana ortalyq meshitinde qazaqtyń kórnekti qaıratkeri, jazýshy Ákim Tarazımen qoshtasý rásimi boldy, dep habarlaıdy “Adyrna” ulttyq portaly.
"Ákim Tarazı búkil sanaly ǵumyryn sóz ónerine arnaǵan, tól ádebıetimiz ben mádenıetimizdi tórge ozdyrǵan ultymyzdyń birtýar perzenti edi. Daryndy qalamger qazaq prozasynyń kókjıegin keńeıtti, ulttyq kıno jáne dramatýrgııa salasyna ólsheýsiz úles qosty. Asyl muratynan eshqashan aınymaǵan qalam ıesin kózi qaraqty oqyrman "Ádebıet áleminiń Ákimi" dep ardaq tutty, zııaly qaýym onyń shyǵarmashylyǵymen qatar adamgershilik qasıetterin erekshe baǵalady. Ónegeli ómir súrip, sońyna mol mura qaldyrǵan Ákim tarazıdiń jarqyn beınesi halqymyzdyń júreginde máńgi saqtalady", – dedi Qazaqstan prezıdenti Qasym-Jomart Toqaevtyń atynan kóńil aıtý hatyn oqyp bergen májilis tóraǵasy Erlan Qoshanov.
Májilis spıkeri memleket basshysy Ákim Tarazı shyǵarmashylyǵyna árqashan erekshe qurmetpen qaraıtynyn atap ótti. Osydan birer jyl buryn eli aldyndaǵy eńbegin úshin jazýshyǵa "Eńbek eri" ataǵy berilgen edi.
Erlan Qoshanov Ákim Tarazıdyń artynda qalǵan mol murasy urpaqtan urpaqqa rýhanı azyq bolaryn aıtty.
Qoshtasý rásimine jazýshynyń týǵan-týystary men jaqyndary, Qazaqstan Jazýshylar odaǵynyń basshylyǵy men músheleri, memlekettik organdardyń ókilderi, elimizdiń shyǵarmashyl zııaly qaýymy qatysty.
Eske salaıyq, jazýshy, Qazaqstannyń Eńbek Eri Ákim Tarazı 22 sáýirde ómirden ozdy.
