Aqtóbe oblysynyń bilim basqarmasyna qarasty "Aqtóbe-Daryn" óńirlik ǵylymı tájirıbelik qosymsha bilim berý ortalyǵy «Elbasy medali» baǵdarlamasyna 104 910 714 teńge qarjy bóldi, - dep habarlaıdy «Adyrna» aqparattyq portaly goszakup.gov.kz caıtyna silteme jasap.
Bıyl 15 aqpan kúni QR Prezıdenti Qasym-Jomart Toqaev «Qazaqstan Respýblıkasynyń Tuńǵysh Prezıdenti – Elbasy týraly» QR Konstıtýııalyq zańynyń kúshin joıý týraly» Zańǵa qol qoıdy. Sodan beri, resmı túrde elimizdegi barlyq saladan «Elbasy» degen ataý da alynyp tastalǵandaı estilmeı ketken edi.
Aqtóbe oblysynyń Bilim basqarmasy sol umytyla bastaǵan ataýdy qaıta jańǵyrtyp, «Elbasy medali» baǵdarlamasyna 104 910 714 teńge bólipti.
Memlekettik satyp alý lotynyń resmı ataýy: «On tórt jastan jıyrma toǵyz jasqa deıingi «Elbasy medali» baǵdarlamasyna qatysýshylardy ádistemelik jáne uıymdastyrýshylyq qoldaýdy qamtamasyz etý jónindegi qyzmetter» dep atalady.
Lottyń tehnıkalyq sıpattamasynda "Elbasy medali" baǵdarlamasyna 14-29 jas aralyǵyndaǵy jastardyń qatysa alatyny, jobaǵa 1000 qatysýshy tartylatyny kórsetilgen. Shara barysynda uıymdastyrýshylar qıyndyqtardy jeńip, ártúrli salalarda ózin júıeli túrde damytyp, basqalarǵa qamqorlyq jasaıtyn, alǵa qoıǵan maqsattary men joǵary nátıjelerine qol jetkizetin tulǵalardy qalyptastyrýdy basty nazarda ustaıtynyn tilge tıek etken.
Sonymen qatar, tehnıkalyq sıpattamada «Qyzmetterdi oryndaý úshin QR Úkimetiniń 2020 jylǵy 14 mamyrdaǵy № 296 Qaýlysy, Nursultan Nazarbaev Qorynyń 2021 jylǵy 3 naýryzdaǵy № 01/011-t "Elbasy medali" baǵdarlamasynyń seriktesterin bekitý týraly qujaty negiz bolyp tabylatyny jazylypty.
«Elbasy medali» baǵdarlamasyna qatysty atalǵan tender ashyq konkýrs tásilimen 14 tamyz kúni jarııalanǵan. Ótinimderdi qabyldaý merzimi 11 kúnnen keıin, ıaǵnı 29 tamyz kúni aıaqtalady.
Aqtóbe oblysynyń bilim basqarmasyna qarasty "Aqtóbe-Daryn" óńirlik ǵylymı tájirıbelik qosymsha bilim berý ortalyǵy ótkizip jatqan «Elbasy medali» baǵdarlamasyna qatysty tenderdi qandaı kompanııanyń utyp alatynyn 29 tamyz kúni qosymsha habarlaıtyn bolamyz.
Qanat Birlikuly
“Adyrna” ulttyq portaly
