Astana kúnine oraı otshashý bolmaıdy. Bul týraly qala ákimdigi málimdedi, dep habarlaıdy “Adyrna” ulttyq portaly.
Ákimdik málimetinshe Astananyń 25 jyldyǵyna oraı 100-den asa is-shara ótkizý josparlanyp otyr eken
Bıyl qala kúnine oraı otshashý bolmaıdy. Alaıda, qalanyń 25 jyldyǵyna oraı 100-den astam is-shara ótkizý josparlanýda. Onyń 90-ǵa jýyǵy - elordanyń barlyq turǵyndary men qonaqtary úshin tegin, – dep jaýap berdi ákimdiktiń baspasóz qyzmeti.
Sonymen qatar mereke kúnderi birqatar áleýmettik nysandardyń ashylýy, sonyń ishinde oqýshylar saraıy, dene shynyqtyrý-saýyqtyrý kesheni, aýlalar men qoǵamdyq keńistikter ashylyp, úleskerlerge páterlerdiń kiltteri tabystalady.
Aıta keteıik, Astana kúnine oraı qazaqstandyqtar 6, 7, 8 jáne 9 shildede demalady.
2020 jyly koronavırýs pandemııasy Qazaqstanda shyrqaý shegine jetkende Astana kúninde atylǵan otshashý áleýmettik qatań synyna ushyraǵan edi. Sodan beri osy kúni otshashý bolǵan emes.
