Qaza tapqan äskeri qyzmetşılerdıŋ otbasylaryna materialdyq qoldau körsetkısı keletın azamattar, biznes ökılderı men ūiymdar üşın bıryŋǧai qor jūmys ısteude.
Būl rette qarajat audaru tek erıktı türde jüzege asyrylady. Oblys äkımdıgı tarapynan azamattarǧa, käsıpkerlerge, ūiymdarǧa nemese olardyŋ qyzmetkerlerıne qarajat audaru turaly eşqandai tapsyrma, talap nemese nūsqau berılgen joq jäne berılmeidı.
Sondai-aq qyzmetkerlerdıŋ bır kündık jalaqysyn audaruy turaly eşqandai tapsyrma berılgen joq. Jalaqyny kömek retınde audaru mındettı emes jäne är qyzmetkerdıŋ jeke şeşımı boiynşa ǧana jüzege asyrylady.
Qoldau körsetkısı keletın azamattar qordyŋ resmi rekvizitterı arqyly qarajatty erıktı türde audara alady nemese qaza tapqan äskeri qyzmetşılerdıŋ tuystaryna tıkelei materialdyq kömek körsete alady.
Kömek körsetu nemese körsetpeu – är adamnyŋ jeke şeşımı. Qarajat audaruǧa eşkımdı mäjbürleuge bolmaidy.
Eske salaiyq, 24 qyrküiekte Maŋǧystau oblysynda Qazaqstan Qaruly küşterı Äskeri-teŋız küşterınıŋ oqu-jattyǧuy kezınde 17 äskeri qyzmetşını teŋız aǧyzyp äketken. Olar Kaspii jaǧalauynda oqu-jauyngerlık tapsyrma oryndap jatqanda aua raiy kürt naşarlap, jel küşeigen.
Qorǧanys ministrlıgınıŋ mälımetınşe, 14 äskeri qyzmetşı qaza tapqan, üşeuı qūtqaryldy.
Qaiǧyly oqiǧadan keiın 25 qyrküiek Qazaqstanda jalpyūlttyq aza tūtu künı bolyp jariialanǧan bolatyn.
