Qazaqstan Premer-Mınıstri Álıhan Smaıylov is-saparmen Tbılısıge bardy, dep habarlaıdy “Adyrna”.
Kezekti saparynda ol Grýzııa Premer-Mınıstri Iraklıı Garıbashvılımen kelissóz júrgizdi. Keleli kezdesýde Álıhan Smaıylov Qazaqstan men Grýzııany burynnan kele jatqan dostyq jáne jan-jaqty yntymaqtastyq baılanystyryp, ekijaqty ózara is-qımyl memleketaralyq baılanystardyń barlyq spektri boıynsha dástúrli joǵary deńgeıde ekenin atap ótti.
Sonymen qatar, Úkimet basshysy Grýzııanyń Qazaqstan úshin mańyzdy seriktes ekenin de aıtty. Mysaly, 2022 jyly Qazaqstan men Grýzııa arasyndaǵy taýar aınalymy 7 ese ósip, qorytyndy rekordtyq $600 mln-ǵa jetti. Atalǵan sala bıyl da qarqyndy damyp keledi, ıaǵnı 4 aıda ózara saýda kólemi 5 ese ulǵaıyp, $167 mln bolǵan.
Álıhan Smaıylov Qazaqstan men Grýzııa yntymaqtastyǵynda kólik tranzıti salasynyń róli mańyzdy ekenin aıtty. Sebebi eki memlekettiń aýmaǵy arqyly iri transkontınentaldyq kólik dálizderi – Eýropadan Qytaıǵa jáne Ońtústik-Shyǵys Azııaǵa eń qysqa joldar ótedi.
«Qazaqstan men Grýzııa yntymaqtastyǵyn damytýda Transkaspıı halyqaralyq kólik baǵytynyń mańyzy zor. Biz óńirdiń kólik baılanysyn arttyrýǵa jáne tranzıt jaǵdaılaryn kezeń-kezeńmen jaqsartýǵa múddelimiz. Bul josparlarda biz Grýzııanyń tranzıttik jáne kólik áleýetin eskeretinimiz sózsiz», — dedi Álıhan Smaıylov.
Kelissózde Qazaqstan men Grýzııa Úkimetteriniń basshylary ózara taýar aınalymyn ulǵaıtý múmkindikterin, kólik ınfraqurylymyn damytý jáne THKB-da biryńǵaı logıstıkalyq operator qurý, sondaı-aq ol arqyly ótetin júk aǵynyn ıfrlandyrý máselelerin talqylady. Resmı sapar aıasynda «Qazaqstan temir joly» UK» AQ men «Grýzııa temir joly» AQ arasynda birlesken kásiporyn qurý men onyń jumysynyń bazalyq qaǵıdattary týraly úshjaqty kelisimge de qol qoıyldy. Keshe bul qujatqa «Ázerbaıjan temir joldary» JAQ qol qoıdy.
Kelissózder qorytyndysy boıynsha eki eldiń Úkimet basshylary baspasózge málimdeme jasaǵan.
