Aldymen Aqorda, keıin Mańǵystaý. Qazaqstannyń batys óńirine at basyn burýdy maqsat etken Germanııa prezıdenti Astanaǵa keldi. Memleket basshysy Qasym-Jomart Toqaev elimizge memlekettik saparmen kelgen Germanııanyń Federaldy Prezıdenti Frank-Valter Shtaınmaıerdi Aqordada saltanatty túrde qarsy aldy, dep habarlaıdy "Adyrna" ulttyq portaly.
Germanııadan jetken mártebeli meımanǵa bar qurmet kórsetildi. Saltanatty rásimder zalynda qaraýyldar sap túzep, qos memleket basshysyna aıryqsha qurmet kórsetti. Osydan keıin Prezıdenttik orkestr eki eldiń memlekettik ánurandaryn shyrqady.
Keıin Germanııanyń Federaldy Prezıdenti Qazaqstan Prezıdentimen ótetin shaǵyn quramdaǵy kezdesý rásimine kóshti.
Naqtylap aıtsaq, Qazaqstan Prezıdentiniń shaqyrýymen elimizge Germanııanyń Federaldy Prezıdenti Frank-Valter Shtaınmaıer memlekettik saparmen Qazaq eline keldi.
Sapar aıasynda eki memleket basshylary Qazaqstan-Germanııa strategııalyq seriktestigin nyǵaıtý máseleleri boıynsha kelissóz júrgizedi. Sonymen qatar, birqatar mańyzdy qujattarǵa qol qoıady dep josparlanǵan.
Germanııa Federaldy Prezıdenti Qazaqstan jáne Germanııa ýnıversıtetteri rektorlarynyń forýmynda sóz sóılep, Qazaqstan Prezıdentimen birge qazaq-german bıznes forýmyna qatysady dep kútilip otyr.
Budan bólek, memlekettik sapar aıasynda Frank-Valter Shtaınmaıer Mańǵystaý oblysyna barady. Ol Mańǵystaýda Qazaqstan-Germanııa ınjenerlik ınstıtýtynyń ashylýyna jáne Svevind shved-german kompanııasynyń jasyl sýtegi óndiretin zaýytynda synama burǵylaý jumystaryn iske qosý rásimine qatyspaq.
"Adyrna" ulttyq portaly
