Prezıdent Qasym-Jomart Toqaev qaza bolǵandardyń otbasynan keshirim surap, olarǵa jeke jeńildikter berýge ýáde berdi. Bul týraly Aqorda málimdedi, dep habarlaıdy “Adyrna” ulttyq portaly.
"Men sizderge kóńil aıtý úshin arnaıy keldim. Ekinshiden, jan-jaqty kómek kórsetiletinin aıtýǵa keldim. Qarjylaı da, basqa da kómek kórsetiledi. Balalar balabaqshaǵa, JOO-ǵa ornalastyrylady – bári oryndalady. Men, árıne, sizdermen birgemin. Sizder – elimizdiń azamatysyzdar",-dedi prezıdent Toqaev.
"Men sizder úshin jaýaptymyn. Men Memleket basshysy retinde bolǵan jaǵdaı úshin keshirim suraımyn. Óte aýyr jaǵdaı ekenin túsinemin. Asyraýshylaryńyzdy, otaǵasyn, eń jaqyn týystaryńyzdy joǵalttyńyzdar. Ókinishke qaraı, ómirde mundaı qaıǵyly jaıttar bolady. Muny aqtaıtyn eshqandaı sebep joq. Taǵy da aıtamyn. Moraldyq jáne materıaldyq kómek kórsetiledi", - dedi Toqaev.
Sondaı-aq, ol qaza bolǵandardyń otbasylaryna jeke járdemaqy taǵaıyndalatynyn atap ótti.
"Men sizderge ýáde beremin. Prezıdent janynan arnaıy qor qurylady. Men zardap shekkenderge jeke kómek kórsetemin, - dedi Memleket basshysy.
Buǵan deıin Toqaevtyń Abaı oblysynda qaza tapqan orman sharýashylyǵy qyzmetkerleriniń otbasymen kezdeskeni habarlanǵan bolatyn.
