Narhoz ýnıversıtetiniń prezıdenti Qanat Qojahmet jelini shýlatqan “dinı dáris” úshin keshirim surady. Bul týraly Bes.media jazdy, dep habarlaıdy “Adyrna” ulttyq portaly.
Aqparat boıynsha, dáristi kásipker Aıajan Jaqsybaı ótkizgen.
Ýnıversıtet prezıdentiniń aıtýynsha, bastapqyda dáristiń taqyryby «Jeke brendti nólden bastaý» dep kórsetilgen. Alaıda, dáris barysynda taqyryptan aýytqyp, spıker ýnıversıtet saıasatyna qaıshy keletin pikirler aıtqan. Bul stýdentter men qoǵam tarapynan teris reakııa týdyrdy.
«Narhoz ýnıversıtetinde kez kelgen saıası nemese dinı úgit-nasıhat júrgizýge tyıym salynǵan. Jaýapty qyzmetkerlerge tártiptik sharalar qoldanyldy», – dedi ýnıversıtet prezıdenti.
Qanat Qojahmet bolashaqta shaqyrylatyn qonaqtardy muqııat baqylaýǵa ýáde berip, oryn alǵan jaǵdaı úshin keshirim surady.
«Mundaı oqıǵalar tek bizde ǵana emes, Garvard, Iel jáne Kolýmbııa ýnıversıtetterinde de kezdesedi. Qatelespeıtin adam joq. Biz stýdentterimiz úshin kóp jumys atqaryp jatyrmyz jáne kez kelgen máselelerdi aldaǵy kezdesýde ashyq talqylaýǵa daıynbyz», – dep atap ótti Qojahmet.
Ýnıversıtet ákimshiligi stýdentter men qoǵamdy jaǵdaıdy túsinistikpen qabyldaýǵa shaqyrdy.
Eske salsaq, jelide stýdentterdiń dinı án aıtyp, dáris ótip jatqan vıdeosy taraǵan bolatyn. Stýdentter bundaı dáris formatyn unatpaı, ýnıversıtet basshylyǵyna shaǵymdanǵan edi.
