Para aldy degen kúdikpen ustalǵan burynǵy Májilis depýtaty Nurjan Áltaev 2 aı qamaýda otyratyn boldy, dep habarlaıdy "Adyrna" ulttyq portaly.
«Nurjan Áltaevqa qatysty bultartpaý sharasy belgili boldy. 2023 jylǵy 9 maýsymda Astana qalasynyń mamandandyrylǵan aýdanaralyq tergeý soty kúdikti N. Áltaevty 2 aı merzimge kúzetpen qamaý túrindegi bultartpaý sharasyn engizdi», - delingen elorda sotynyń habarlamasynda.
Eske sala keteıik, 7 maýsymda Májilistiń eks-depýtaty Nurjan Áltaev para aldy degen kúdikpen ustaldy.
Bul aqparatty Sybaılas jemqorlyqqa qarsy is-qımyl agenttigi rastady.
Keıinirek Antıkor Nurjan Áltaevtyń Abylaı Myrzahmetovten aı saıyn 5 myń dollar para alyp otyrǵanyn habarlady.
«Nurjan Áltaev 2018-2019 jyldar aralyǵynda QR Eńbek jáne halyqty áleýmettik qorǵaý vıe-mınıstri bola tura, júıeli túrde «Atameken» ulttyq kásipkerler palatasynyń basqarma tóraǵasy A.I. Myrzahmetovten para retinde aı saıyn 5 000 AQSh dollary mólsherinde aqsha qarajatyn alyp otyrdy dep kúdiktenedi. Keıinnen Áltaev 2019-2020 jyldar aralyǵynda QR Parlamenti Májilisiniń depýtaty laýazymyn atqara otyryp, Myrzahmetovten para alý boıynsha óziniń sybaılas jemqorlyq qyzmetin jalǵastyrdy. Jalpy alǵanda, ol para retinde 135 000 AQSh dollaryn aldy. Bul asa iri kólem bolyp sanalady», - dep habarlady Antıkor.
"Adyrna" ulttyq portaly
