Altaı Kólginov Premer-Mınıstrdiń orynbasary qyzmetinen bosatyldy. Bul týraly Prezıdenttiń baspasóz qyzmeti jazdy, dep habarlaıdy «Adyrna» tilshisi.
«Memleket basshysynyń Jarlyǵymen Altaı Seıdiruly Kólginov Qazaqstan Respýblıkasy Premer-Mınıstriniń orynbasary laýazymynan bosatyldy»,—delingen habarlamada.
Aıta keteıik, ol bul qyzmetke 2022 jyldyń jeltoqsanynda taǵaıyndalǵan edi.
Buǵan deıin Kólginov Astana ákimi bolyp turǵanda qalanyń sý máselesin sheshý úshin biraz jumys jasaǵanyn alǵa tartyp, ózine taǵylǵan aıyptardy joqqa shyǵardy.
«Astanadaǵy keıbir jerlerde sý tapshylyǵy bar. Men turatyn turǵyn úıde sý bar. Almaty aýdanyndaǵy kópqabatty úıde turamyn»,—dedi ol.
Al kúni keshe Memleket basshysy Qasym-Jomart Toqaev elorda ákimi Jeńis Qasymbektiń sý tapshylyǵy jaǵdaıy týraly esebin tyńdap, máseleni jedel sheshýdi tapsyrdy.
Altaı Seıdiruly 1978 jyly dúnıege kelgen. Ol A.Iasaýı atyndaǵy halyqaralyq qazaq-túrik ýnıversıtetin, Qazaqstan Respýblıkasy Prezıdenti janyndaǵy memlekettik basqarý akademııasyn, «Bolashaq» baǵdarlamasy boıynsha Ulybrıtanııanyń Aberdın ýnıversıtetin bitirgen. Memlekettik jáne jergilikti basqarý magıstri, halyqaralyq kommerııalyq quqyq magıstri.
2000 jyly Qazaqstan Respýblıkasynyń Qarýly kúshterinde qyzmet etken.
2001-2008 jyldary Qazaqstan Respýblıkasy Ádilet mınıstrligi, Memlekettik qyzmet isteri Agenttigi jáne Bas prokýratýra organdarynda ár túrli laýazymda qyzmet atqarady.
2008-2010 jyldary - «AlashMedıaGrýpp» JShS bas dırektorynyń orynbasary.
2010-2012 jyldary Qazaqstan Respýblıkasy Prezıdenti Ákimshiliginiń aımaqtyq-uıymdastyrý jáne memlekettik baqylaý jumystary bóliminiń memlekettik ınspektory qyzmetin atqardy.
2012-2013 jyldary Batys Qazaqstan oblysy ákiminiń orynbasary.
2013-2016 jyldary Oral qalasynyń ákimi qyzmetinde boldy.
2016 jyldyń 26 naýryzynan Batys Qazaqstan oblysynyń ákimi qyzmetin atqardy.
2019-2022 jyldary Astana qalasynyń ákimi qyzmetin atqardy.
