Eks-prezident Nūrsūltan Nazarbaevtyŋ nemere ınısı Qairat Satybaldy qamauda otyrǧan kezınde 6 mlrd teŋgege Almatydan qonaq üi satyp alǧan. Būl turaly Mäjılıs deputaty, jurnalist Maqsat Tolyqbai aitty, dep habarlaidy «Adyrna» tılşısı.
Ol Hilton qonaq üiınıŋ 160 qyzmetkerınıŋ aryz-şaǧymyn tyŋdap qaitqanyn atap öttı. Aituynşa, būl qonaq üidıŋ iesı Şolpan Karaneeva ǧimaratty Qairat Satybaldynyŋ reiderlık jolmen tartyp alǧanyn 2020 jyly-aq aşyq aityp, talai būqaralyq aqparat qūralyna sūhbat bergen, appeliasiialyq sotqa şaǧymdanǧan. Alaida odan eş nätije şyqpaǧan.
«Osydan tört jyl būryn (2019 j) franchaizing kelısımımen Hilton qonaq üiın salǧan. Qūrylysty aiaqtau üşın «Capital Bank Kazakhstan» AQ-ǧa qonaq üidı kepılge qoiyp 4 mlrd 200 mln teŋge somasynda qaryz alǧan. Koronavirus pandemiiasy bastalǧan 2020 jyly Hilton qonaq üiı qyzmetın uaqytşa toqtatqan. Sol kezde Prezident käsıpkerlerdı tūralap qalmau üşın bankterge tölemderdı uaqytşa toqtatuǧa būiryq bergen. Al «Capital Bank Kazakhstan» AQ Prezident būiryǧyn pysqyrmaǧan. Bank tarapy ötınışke jauap bermei, qonaq üidı «Zaŋger» kollektorlyq agenttıgıne beredı. Al «Zaŋger» qonaq üidıŋ naryqtaǧy qūny 9,5 mlrd teŋgeden assa da, ony bar bolǧany 5,1 mlrd teŋgege baǧalap, «Baidala» JŞS-ǧa satyp jıbergen»,— deidı «ABLİ Qūrylys»kompaniiasynyŋ qūryltaişysy.Maqsat Tolyqbai būl ıste zaŋsyzdyqtyŋ köp ekenın jetkızdı.
«Qairat Satybaldy abaqtyǧa qamalyp, dünie-mülkı tärkılengen kezde bızdıŋ qūzyrly organdar DoubleTree by Hilton qonaq üiın de Qairattyŋ tärkılengen mülıkterınıŋ qataryna qosyp qoiǧan eken. «ABLİ Qūrylys» kompaniiasy «Bız «Baidala» JŞS-men sottasyp jatyrmyz, būl qalai Qairat Satybaldyǧa ötıp ketedı, ıs älı qaralyp jatyr ǧoi?!» dep aryz tüsırgennen keiın Qairat pen «Baidala» arasynda tez arada kelısımşart jasalady. Türmede! Ol jerge notariusty qalai kırgızıp jür, türmede otyrǧan Qairattyŋ qaltasynda 6 mlrd teŋge qaidan jür?! Būl jerde de zaŋsyzdyq köp»,—dedı ol.Deputat şaǧymdanuşylardyŋ aryzyn Antikor men Bas prokurorǧa joldaǧanyn da atap öttı.
«Bız şyn mänınde Ädılettı Qazaqstan qūrǧymyz kelse, osyndai zaŋdy biznesın äldekımder köpe-körneu tartyp alǧan tūlǧalardyŋ da zary men mūŋyna qūlaq türıp, köŋıl böluımız kerek şyǧar. Jäbırlenuşı tarap qūzyrly organdardyŋ ıstı ädıl qarauyn sūraidy»,—dep tüiındedı Maqsat Tolyqbai.Aita keteiık, Qairat Satybaldy 2022 jyldyŋ 13 nauryzynda ūstalyp, uaqytşa ūstau izoliatoryna qamalǧan bolatyn. Ol «Qazaqtelekom» AQ men «Kölıktık servis ortalyǧy» AQ qarajatyn asa ırı kölemde ūrlau faktılerı boiynşa aiyptalyp, 6 jylǧa sottaldy.
Ūqsas jaŋalyqtar
