Qaırat Satybaldyǵa qatysty basty sot otyrysynyń ýaqyty belgilendi. Bul týraly Astana qalasynyń qylmystyq ister jónindegi aýdanaralyq sotynyń baspasóz qyzmeti málimdedi, dep habarlaıdy “Adyrna” ulttyq portaly.
«Sotqa Qaırat Satybaldyulyna qatysty is tústi. Basty sot otyrysy 2024 jyldyń 1 sáýirine saǵat 10.00-ge belgilendi», - delingen habarlamada.
Qylmystyq jolmen alynǵan aqshany zańdastyrý (jylystatý) boıynsha (QK-niń 218-baby 3-bóliginiń 3-tarmaǵy) aıyp taǵyldy.
Sot ashyq rejımde ótedi.
Aıta keteıik, Nazarbaevtyń nemere inisi Qaırat Satybaldy 2022 jyly naýryzda ustalǵan bolatyn. Qazaqstannyń sybaılas jemqorlyqqa qarsy qyzmeti oǵan qatysty laýazymdyq ókilettikti asyra paıdalaný jáne "Qazaqtelekom" AQ-nyń qarajatyn asa iri kólemde jymqyrý faktileri boıynsha qylmystyq isti tergegen.
Araǵa bir apta salmaı Satybaldynyń burynǵy áıeli Gúlmıra Satybaldy da ustaldy. Oǵan jáne basqa da tulǵalarǵa reıderlik jolmen bıznesti tartyp alý deregi boıynsha sotqa deıingi tergeý amaldary bastaldy.
Byltyr 4 mamyrda Gúlmıra Satybaldy 7 jylǵa bas bostandyǵynan aıyryldy. 2023 jyldyń maýsymynda Qyzylorda soty burynǵy úkimdi nazarǵa alyp, kesilgen jazany aýyr jazaǵa almastyrý arqyly 8 jylǵa bas bostandyǵynan aıyrdy.
Antıkor Gúlmıra Satybaldy kásiporyndardyń qatysý úlesterin zańsyz ıemdený, sonyń ishinde adam urlaýmen ushtasqan eki fakti boıynsha tergelgen. Jábirlenýshige keltirilgen zalal somasy 6,6 mıllıard teńgeden asady. Tergeý kezinde aıyptalýshy memleketke 8 mln dollar kólemindegi qarjyny qaıtardy.
Al 2022 jyly Satybaldy "Qazaqtelekomǵa" keltirgen shyǵyndy ótedi. Sol jyly 6 jylǵa sottaldy.
