Áıelin uryp óltirdi dep aıyptalǵan Qýandyq Bıshimbaevtyń isi sotqa joldandy, dep habarlaıdy “Adyrna” portaly.
Bul aqparatty jábirlenýshi taraptyń advokaty Janna Muhamadı málimdedi.
Advokattyń aıtýynsha isti Astana qalasynyń qylmystyq ister jónindegi mamandandyrylǵan aýdanaralyq soty qaramaq.
Osy tusta Astana qalalyq soty da qos kúdikti Q.Bıshimbaev pen B.Baıjanovqa qatysty qylmystyq is kelip túskenin rastaǵan.
Saltanat Núkenovanyń “ólimine qatysy bar” dep kúdikke ilingen Bıshimbaevqa QK-niń 99-baby 2-bóliginiń 5-tarmaǵy, adam óltirý, basqa adamǵa qatysty quqyqqa qarsy qasaqana asa qatygezdikpen jasalǵan adam óltirý, QK-niń 110-baby 2-bóliginiń 1-tarmaǵy boıynsha kináli adamǵa materıaldyq jaǵynan táýeldi adamǵa qatysty júıeli túrde uryp-soǵý nemese ózge de zorlyq-zombylyq áreketteri arqyly fızıkalyq jáne psıhıkalyq qınaý faktisi boıynsha aıyp taǵylyp otyr.
Al ekinshi kúdikti Baıjanov QK-niń 432-baby, asa aýyr qylmysty kúni buryn ýádelespeı jasyryp qalý jáne QK-niń 434-baby, belgili asa aýyr qylmys jasaǵany týraly habarlamaý faktisi boıynsha aıyptalýda.
Eks-mınıstrdiń isin Astana qalasynyń qylmystyq ister jónindegi mamandandyrylǵan aýdanaralyq sotynyń tóraǵasy, sýdıa Aıjan Qulbaeva júrgizetini málim boldy.
Tóraǵa bul qyzmetke Prezıdenttiń 2022 jylǵy 28 jeltoqsandaǵy Jarlyǵymen taǵaıyndalǵan.
Eske sala keteıik, 3 aı buryn Qýandyq Bıshimbaev óziniń áıeli Saltanat Núkenovany «qatigezdikpen óltirdi» degen kúdikpen qamalǵan edi. Qaıǵyly oqıǵa 2023 jyly 9 qarasha kúni elordadaǵy BAU meıramhanasynda bolǵan.
