Maŋǧystauda paidalanylmai jatqan 356 myŋ gektardan astam auyl şaruaşylyǧy jerı memleket menşıgıne qaitaryldy. Būl turaly Maŋǧystau oblysy äkımınıŋ baspasöz qyzmetı mälımdedı, dep habarlaidy “Adyrna” ūlttyq portaly.
Öŋır basşysynyŋ tapsyrmasymen auyl şaruaşylyǧy maqsatyndaǧy jerlerdı paidalanudy qadaǧalaityn jūmys toby qūryldy. Aldyn ala jürgızılgen saraptama qorytyndysy boiynşa oblysta 973 myŋ gektar auyl şaruaşylyǧy jerı anyqtalǧan. Onyŋ 356 myŋ gektardan astamy memleket menşıgıne qaitarylǧan.
Atap aitqanda, mynalar memleket menşıgıne qaitaryldy:
Tüpqaraǧan audany – 85,3 ga
Mūnaily audany – 26,09 ga
Beineu audany – 33,8 ga
Qaraqiia audany – 171,8 ga
Maŋǧystau oblysy – 39,6 ga
Jaŋaözen - 10 ga.
Monitoring nätijesınde igerılmei jatqan auyl şaruaşylyǧy jerlerınıŋ basym bölıgı «Senek» JŞS (288 946 ga), «Tauşyq» JŞS (247 633 ga) jäne «Qaraǧantübek» (212 192 ga) jerlerıne tiesılı ekenı anyqtaldy. Monitoring, tekseruden keiın «Senek» JŞS 168 946 gektar, «Tauşyq» JŞS 70 myŋ gektar jerdı öz erkımen memleketke qaitardy.
Sonymen qatar jospardan tys tekseru turaly habarlamadan keiın jerınıŋ jalpy kölemı 67 787 ga bolatyn 85 jer paidalanuşy qolda bar malyn İSJ bazasyna tırkedı.
«Memlekettık qorda 8 million 667 myŋ gektar jaiylymdyq jer bar. Öŋırde auyl tūrǧyndary bosalqy jerler, sondai-aq jaqyn maŋdaǧy auyl şaruaşylyǧy ūiymdarynyŋ esebınen mal jaiylymymen qamtamasyz etılgen. Eldı mekenderdı jaiylymdyq jerlermen qamtuda ötkır problemalar joq. Degenmen eldı mekenderdıŋ aumaǧyn keŋeitu arqyly qosymşa jaiylymdyq jerlermen qamtamasyz etu josparlanuda. Qazırgı taŋda alystaǧy jaiylymdyq jerlerdı de auyl şaruaşylyǧy ainalymyna tartu, halyqqa paidalanu mäselelerı pysyqtaluda», – deidı Maŋǧystau oblysy jer resurstaryn basqaru departamentınıŋ basşysy Qaharman Baǧynov.Barlyq qaitarylǧan jerler endı Auyl şaruaşylyǧy ministrlıgı men Sifrlyq damu jäne aeroǧaryş ministrlıgı bırlesıp äzırlegen geoserviste körsetıledı. İnteraktivtı karta azamattarǧa kez kelgen uaqytta qaitarylǧan auyl şaruaşylyǧy jerlerı boiynşa monitoringtı jüzege asyruǧa mümkındık beredı jäne osy uchaskelerdı alu maqsatynda jergılıktı atqaruşy organdarǧa ötınış beru üşın baǧdar bolady. Būl jyldar boiy paidalanylmaǧan auylşaruaşylyq jerlerın ainalymǧa tartuǧa, sondai-aq tūrǧyndardy auyl şaruaşylyǧy üşın qajettı alaŋdarmen qamtamasyz etuge mümkındık beredı.
Ūqsas jaŋalyqtar
