16 qyrküiek künı "Adyrna" ūlttyq portalynda "Auǧan soǧysy ardagerlerınıŋ eskertkışın jaŋǧyrtuǧa 257 million 590 myŋ teŋge qarjy bölındı degen material jariialanǧan edı. Osy maqalaǧa qatysty Maŋǧystau oblystyq Işkı saiasat basqarmasyna bırqatar sūraq joldaǧanbyz. Sol saualdarǧa jauap keldı. Maŋǧystaulyq şeneunıkter Auǧan soǧysy ardegerlerınıŋ qūrmetıne arnap 257 million 590 myŋ teŋgege eskertkış ornatyp qana qoimai, eskı eskertkıştı Mūnaily audanyna köşıretının de mälımdedı, - dep habarlaidy Adyrna ūlttyq portalynyŋ tılşısı.
"Adyrna" ūlttyq portaly Maŋǧystau oblystyq Işkı saiasat basqarmasyna "Auǧan soǧysy ardagerlerınıŋ qūrmetıne arnalyp Aqtau qalasynda 2005 jyly eskertkış ornatylǧan eken. Ol eskertkıştı qaita jaŋǧyrtudyŋ ideologiialyq tūrǧyda qanşalyqty qajettılıgı bar? "Maŋǧystau oblysynyŋ qarjy basqarmasy" memlekettık mekemesı bar eskertkıştı qaita jaŋǧyrtuǧa oblys qazynasynan 257 590 233.00 teŋge bölgen. Osynşama köp qarjy jūmsau arqyly oblys keŋestık däuırdıŋ eŋ ädıletsız soǧysy sanalatyn Auǧan qyrǧynyn ideologiialyq qūralǧa ainaldyrudy közdep otyr ma?" degen saual joldaǧan edı.
Bızden joldanǧan saual mätını ideologiialyq negızge qūrylǧan. "Keŋestık däuırdıŋ eŋ ädıletsız soǧysy sanalatyn Auǧan qyrǧynyn ideologiialyq qūralǧa ainaldyrudy közdep otyr ma?" degen sūraqtan-aq būl mäselege Işkı saiasat basqarmasy tıkelei jauap beru kerektıgı körınıp tūr. Bıraq, qyzyǧy Maŋǧystau oblysynyŋ ideologiiasyna Işkı saiasat basqarmasy emes, Aqtau qalalyq ışkı saiasat jäne tılderdı damytu bölımı jauap beredı eken. Bızge jauapty sol qalalyq mekeme jazypty. Būl - bır.
Ekınşıden, qalalyq ışkı saiasat sözdıŋ basyn barlyq jauapkerşılıktı oblys äkımıne audarudan bastapty. Qaraŋyz:
"Maŋǧystau oblysynyŋ äkımı N.A. Noǧaevtyŋ azamattyq qoǧam ökılderımen kezdesuı otyrysynyŋ 04.10.2022 jylǧy № 01-01/86 sandy hattamasynda internasionalist jauyngerlerge arnalǧan eskertkıştıŋ eskizdık jobasyn jasaqtau jäne eskertkıştı ornatu mäselesın pysyqtau boiynşa tapsyrma berılgen bolatyn. Atalǧan tapsyrmaǧa säikes, «1979-1989 jyldary Auǧanstanda Maŋǧystau oblysynyŋ qaza tapqan internasionalist-jauyngerlerınıŋ qūrmetıne Aqtau qalasynda eskertkıştı qaita jaŋartu» jobasy äzırlenıp, qorytyndyǧa säikes smetalyq qūjattamalary jasaqtaldy. Qazırgı taŋda atalǧan jūmys boiynşa reitingtık-balldyq jüiesın qoldanu arqyly konkurstyq ıs-şaralar jürgızılude".
Demek, resmi berılgen jauapqa sensek 257 million 590 myŋ teŋgege eskertkış ornatuǧa tapsyrma bergen Maŋǧystau oblysynyŋ äkımı Nūrlan Noǧaev bolyp şyǧady. Noǧaev sonda Maŋǧystau halqynyŋ Qaŋtar oqiǧasynyŋ aldynda gazdyŋ qymbattauyna qarsy köterılgenın, būl bas köterudıŋ soŋy memleketımızdıŋ şaŋyraǧyn şaiqaltyp jıbere jazdaǧanyn ūmytyp ketkenı me?
Qazır 257 million 590 myŋ teŋgege eskertkış ornatatyn kez emes. Onsyz da bar eskertkıştı qaita jaŋǧyrtuǧa qajettılık joq. Al, Maŋǧystau şendılerı sonyŋ bırın de qaperge almai, Aqtau qalasyna Auǧan soǧysy ardagerlerıne jaŋa eskertkış ornatyp berıp, eskısın Mūnaily audanyna köşırmek körınedı.
Aqtau qalalyq ışkı saiasat bölımınen kelgen jauapta "Atalǧan eskertkış oblys ortalyǧy statusy eskerıle otyryp Aqtau qalasynda ornalastyrylyp, būryn ornatylǧan eskertkış Mūnaily audanyna köşırıletın bolady. Joba boiynşa memorialdyq keşen 5 bölıkten tūrady: stendı bar kıreberıs, qaza tapqan auǧan jauyngerlerınıŋ esımderı men portretterı bar stellalar, ekı auǧan jauyngerınıŋ eskertkışı türındegı ortalyq kompozisiia, «Soǧysta 10 jyl» kolonnasy jäne basqa da barlyq ūrys qimyldaryna qatysuşylardyŋ qūrmetıne arnalǧan stend. Memleketımızdıŋ qauıpsızdıgın qorǧau jolynda qaza tapqan, erlık körsetken jauyngerlerdıŋ, bozdaqtarymyzdyŋ eren eŋbegı eş ūmytylmauy tiıs. Jobanyŋ basty maqsaty da osy. Iаǧni, öskeleŋ ūrpaqty täuelsız eldıŋ tarihy, ötkenı men bügınınen habardar etu, erlıktı därıpteu, nasihattau" delıngen.
Auǧan soǧysy – ideologiialyq tūrǧyda tarihtan älı künge ädıl baǧasyn almaǧan maidan. Keşegı Keŋester odaǧynyŋ solaqai saiasatynyŋ kesırınen sol ädıletsız maidanda myŋdaǧan jastarymyz şeiıt kettı. Ärine, ony eşkım joqqa şyǧarmaidy. Bıraq, qalalyq ışkı saiasat bölımınıŋ sözımen aitsaq, öskeleŋ ūrpaqqa täuelsız eldıŋ tarihyn, ötkenı men bügının nasihattau üşın bar eskertkıştı köşırıp, onyŋ ornyna basqa eskertkış qoiuymyz kerek pe? Osy üşın memleket biudjetınen 257 million 590 myŋ teŋge qarjy bölgızu qanşalyqty ädılettı?
2005 jyly ornatylǧan tarihi eskertkıştı Mūnailyǧa köşırıp, onyŋ ornyna basqa eskertkış qoiu būl oblysta äleumettık mäselenıŋ bärı şeşıldı degendı bıldıre me?
Qanat BIRLIKŪLY,
«Adyrna» ūlttyq portaly
Ūqsas jaŋalyqtar
