Pavlodardaǵy Lenın kenti endi Atameken dep atalatyn bolady, dep habarlaıdy “Adyrna” ulttyq portaly.
Pavlodarnews.kz jazýynsha, Kent turǵyndary osy ataýdy tańdaǵan. Pavlodar qalasyna qarasty Lenın kentiniń mádenıet úıinde kent ataýyn ózgertý boıynsha qoǵamdyq tyńdaý ótti. Kent ákimi Marjan Alshymbaevanyń aıtýynsha, toqsan saıyn turǵyndarmen kezdesý ótip turady. Sol kezdesýlerde kenttiń ataýyn ózgertý týraly ótinish jıi túsip turǵan.
Bıyl birqatar turǵyndardan qala ákimi men oblys ákimine kenttiń ataýyn ózgertý týraly ótinish túsken. Sodan keıin 1 aı buryn oblystyq gazetterde 29 sáýirde qoǵamdyq tyńdaý ótetini týraly habarlama taratylǵan.
«Oǵan deıin jergilikti turǵyndarmen jıyndar ótti. Aqparattandyrdyq. Toptar quryldy. Kóp usynys tústi. 20-ǵa jýyq ataý usynyldy. Degenmen jergilikti turǵyndarmen ótken jıyndarda 7 usynys irikteldi. Oǵan Qazanǵap, Bıdaıyq, Atameken, Yntymaq, Qazyna, Jetinshi aýyl ataýlary jáne ataýdy ózgertpeý nusqasy kirdi. Odan keıin búgingi qorytyndy jıynda eki ataý: Qazanǵap bı jáne Atamekendi qarastyrý týraly sheshim qabyldandy», – dedi Marjan Alshymbaeva.
Qoǵamdyq tyńdaýǵa kent turǵyndary, jergilikti qoǵamdastyq músheleri, jaqyn aýyldardaǵy jáne qaladaǵy aýyldyń týmalary, aýylǵa qatysy joq adamdar da keldi. Jınalǵandardyń pikiri tyńdaldy. Alaıda sheshimdi jergilikti qoǵamdastyq músheleri shyǵardy.
Daýys berýge jergilikti qoǵamdastyqtyń 50 múshesi qatysyp, 49 adam Atameken ataýyna daýys berdi. Endi zańnama boıynsha ataýdy ózgertý jumysyna 3-6 aı ýaqyt jumsalady.
